Mańǵystaý oblysynda qyrylǵan aqqýlardyń sany myńǵa jaqyndap qaldy, dep habarlaıdy Egemen.kz.
Jergilikti BAQ-tyń jazýynsha, óńirde 988 aqqýdyń óleksesi tabylǵan. Onyń ishinde 20 shaqtysy Qaraqııa óńirindegi teńiz jaǵasynan baıqaldy. Bul týraly aýmaqtyq orman sharýashylyǵy jáne janýarlar dúnıesi ınspeksııasynyń basshysy Ǵabbas Dosatov málimdedi.
Qaraqııa aýdanynyń ákimdigi bul aqparatty rastady. Aýdan ákiminiń orynbasary Asan Chýkın turǵyndardyń teńiz jaǵasyna shyǵýyna ýaqytsha shekteý engizilgenin aıtty.
- Tabylǵan qyrylǵan aqqýdyń barlyq óleksesi joıyldy. Arnaıy komıssııa qurylyp, bekitilgen is-sharalar josparyna saı jumys isteıdi. Qazir qustardy izdeý maqsatynda jaǵalaýdaǵy aýmaqtar tekserilip jatyr. Adamdarǵa teńiz jaǵasyna shyǵýǵa ýaqytsha shekteýler engizildi. Polısııa qyzmetkerleri jaǵalaýdaǵy aýmaqtardy patrýldep, úı janýarlary aýrýynyń aldyn alý maqsatynda turǵyndarǵa teńiz jaǵalaýyna ýaqytsha barmaý kerek ekenin eskertti, - dedi Asan Chýkın.
Onyń aıtýynsha, Qaraqııa aýdanynda 2672 bas qus tirkelgen. Qustardy vaksınalaý 2023 jyldyń qyrkúıeginde bastaldy. Búginde 80%-yna vaksına egilgen. Alańdaýdyń qajeti joq, biraq qaýipsizdik sharalaryn saqtaý mańyzdy.
2023 jyldyń 27 jeltoqsanynda Mańǵystaýdaǵy Qarakól kóliniń jaǵasynan 30 aqqýdyń óleksesi tabylǵan. Bul týraly Ústirt memlekettik tabıǵı qoryǵy habarlady. Keıin Aqtaý mańynda 600 aqqý qyrylǵany belgili boldy.