Aınaldyrǵan 14 jyly aıaldamany aıalap ustaý qaraǵandylyqtarǵa qıynǵa túsip tur. Jyly aıaldamanyń kóbinde jylý joq. Arqanyń saryshunaq aıazy aı basynan beri qaraǵandylyqtardy álekke saldy.
Jolaýshylar avtobýsty jylynyp emes, tońyp tosyp júr. Buǵan deıin birneshe ret qadaǵalaý joqtyǵynan áınekteri de shaǵylǵan, esikteri de qıraǵan. Munymen qosa, jolaýshylar tazalyǵyna narazy.
«Qaraǵandynyń qysy qatty. Sol sebepti jyly aıaldama salynǵanda qýanǵan edik. Alaıda qalamyzdaǵy aıaldamalar sýyq. Onymen qosa jaǵymsyz ıis bar. Úısiz-kúısiz júrgender túnep shyǵady. Ol jerge kirip alyp, tunshyǵyp turǵansha, dalada turǵanymyz jaqsy. Qadaǵalaıtyn jaýapty mekeme joq pa? Tańymyz bar. Bar nárseni durys kádege jarata almaı otyrmyz», deıdi qala turǵyny Eldos Bolatuly.
Qazybek bı aýdanynyń tirshilikti qamtamasyz etý bóliminiń bas mamany Dinmuhamed Raıymbekov apta saıyn aıaldamalar tazalanady deıdi. Iаǵnı bir ret sýmen jýylsa, eki ret hımııalyq tazalaý júrgiziledi. Jyly aıaldamalardyń sýyq bolýy jabdyqtardyń isten shyǵýynan deıdi. Jóndeý jumystary aıaqtalǵan soń bári qalpyna keledi dep sendiredi.
Byltyrǵy qysta Kenshiler mádenıet saraıynyń aldyndaǵy aıaldamanyń jylytqysh peshi urlanǵan edi.
Urylar izin ábden jasyrsa kerek, kúdiktilerdi qolǵa túsire almaı polıseıler álek bolǵan. Tipti terezesin shaqqan buzaqylar da ustalmaǵan. Bizdiń quqyq qorǵaý organy qyzmetkerleri qulyq tanytpaı otyr ma, álde? Bulaı jalǵasa berse, aıaldamanyń ózinen aıyrylyp, jer sıpap qalýymyz da múmkin ǵoı. Beınebaqylaý kameralaryn ornatýdy bul oqıǵalar qaperimizge salyp-aq tursa da, áli salǵyrttyq tanytyp otyrmyz…
Qala turǵyndarynyń renish bildiretin jóni bar. Aıaldamamyz túnde qańǵybastardyń qara qosyna aınalyp turǵany ras-ty. Bizdiń de kózben kórip júrgenimiz – sol kórinis… Iá, jedeldetip jaýaptylar bul máseleni nazarǵa almasa, jyly aıaldamalardyń «jyry» kóbeıip turǵany turǵan…
Aıta keteıik, bıyl taǵy dáp osyndaı 11 aıaldama salynady. Aldymen, aıalap ustaýdy úırensek eken...
Qaraǵandy oblysy