«Aýyl» partııasynyń Jastar qanaty 16 qańtarda barlyq óńirde «Men – donormyn» atty áleýmettik jalpyrespýblıkalyq aksııa uıymdastyrdy.
Aksııanyń basty maqsaty – mıllıondaǵan adamnyń ómirin saqtap qalýǵa múmkindik beretin qan men onyń komponentteri qoryn toltyrýǵa sep bolý, emdeý mekemelerin qaýipsiz qan komponentteriniń qajetti kólemimen qamtamasyz etý úshin halyq arasynda óteýsiz erikti qan donorlyǵyn nasıhattaý.
Álemdik tájirıbe kórsetkendeı, donorlyqty damytýǵa barlyq deńgeıdegi memlekettik organ, qoǵamdyq uıym men birlestik, jumys berýshi, BAQ, dinı, bilim berý jáne basqa da uıymdar qatysýǵa tıis.
Sonymen, Astanada «Aýyl» partııasynyń Ortalyq apparaty men Jastar qanatynyń 30-ǵa jýyq múshesi jáne aımaqtarda 20 óńirlik fılıaldyń 400-den asa múshesi bir mezette jergilikti ortalyqtarda qan tapsyrdy.
Qan ortalyǵy mamandarynyń aıtýynsha, tek Astananyń ózinde 20 aýrýhana qanmen qamtamasyz etilýi kerek. «Aýyl» partııasynyń 20 fılıaly uıymshyldyqpen atsalysqan búgingi aksııa osy údeden shyǵa bildi.
Partııanyń aksııa ótkizip, halyq arasynda donorlyqty nasıhattaýy óskeleń urpaqty meıirimdilik pen izgilikke tárbıeleýge, donorlyqtyń mańyzyn sanaly túrde túsindirýge baǵyttalǵan.