Úkimette vıse-premer Serik Jumanǵarınniń tóraǵalyǵymen Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń otyrysy ótti.
Kún tártibindegi basty máselelerdiń biri – ishki óndiristi qoldaý jáne júgeriniń satylýy. Aýyl sharýashylyǵy mınıstrliginiń derekterine sáıkes 2023 jyly júgeriniń egis kólemi 12,8 myń gektarǵa ulǵaıtylyp, 193,8 myń gektarǵa jetkizildi (2022 jyly 180,9 myń gektar). Qazirdiń ózinde ortasha ónimdiligi 65,8 s/ga (2022 jyly – 57 s/ga) 1 207,5 myń tonna júgeri dáni bastyryldy.
О́ńdelgen ónim kólemi de, atap aıtqanda, tátti sýsyndar, tuzdyqtar daıyndaý úshin jáne kondıterlik salada qoldanylatyn tabıǵı jáne ımmýnıtetke paıdaly qant almastyrǵysh shárbat óndirisi jyl saıyn artyp keledi. 2021 jyly elimizde 46,3 myń tonna shárbat, 2022 jyly 57,3 myń tonna óndirildi. Al 2023 jyldyń 10 aıynda 40,7 myń tonna ónim shyǵaryldy.
Júgerini tereń óńdeý boıynsha eki otandyq zaýyttyń jalpy qýattylyǵy jylyna 210 myń tonnany quraıdy. Elimizdegi qaıta óńdeý óndirisiniń ósip kele jatqan kólemi men áleýetin eskere otyryp, otandyq kondıterlik ónimder men sýsyndar óndirisindegi otandyq melassanyń úlesin arttyrý múmkindigin talqylaý týraly sheshim qabyldandy.
VAK otyrysynda qazaqstandyq júgerini ótkizý boıynsha qabyldanyp jatqan sharalar tyńdaldy. Búginde bizdiń júgerini jańa naryqtarǵa – Qytaıǵa, Iranǵa jetkizý múmkindigi pysyqtalyp jatyr.
Sondaı-aq VAK sheńberinde saýda rásimderin jeńildetý jónindegi ulttyq komıtettiń otyrysy ótti. Jıynǵa qatysýshylar ótken jyldy qorytyndylap, 2024 jylǵa arnalǵan josparlardy talqylady. Qazaqstan DSU-nyń saýda rásimderin jeńildetý jónindegi kelisiminde kózdelgen óz mindettemelerin 100%-ǵa oryndaǵany atap ótildi.
Saýda jáne ıntegrasııa mınıstrligi «QazTrade» AQ jáne halyqaralyq uıymdarmen birlesip daıyndaǵan Qazaqstan Respýblıkasynyń saýda rásimderin jeńildetý jónindegi alǵashqy ulttyq baıandamasynyń negizgi tarmaqtary qaraldy. Qujatta elimizdiń DSU-ǵa kirgen kezinen bastap saýda rásimderin jeńildetý boıynsha Qazaqstan Úkimetiniń qabyldaǵan sharalaryna taldaý usynylǵan.
Qazaqstannyń jahandyq jetkizý tizbegine qatysýyna baǵa berilip, qaǵazsyz transshekaralyq saýdany damytýdaǵy Qazaqstannyń ustanymyna taldaý berilgen. Sońǵy jyldary Qazaqstanda halyqaralyq saýdanyń damýyna qolaıly jaǵdaı týǵyzǵan iri jobalar júzege asyrylyp keledi. Atap aıtqanda, 2018-2019 jyldary «Astana-1» jáne «Eksporttyq-ımporttyq operasııalarǵa arnalǵan biryńǵaı tereze» aqparattyq júıeleri engizildi. 2023 jyly saýda rásimderin jeńildetý boıynsha Qazaqstannyń saýda portaly iske qosyldy. Sonymen qatar Central Asia Gateway aımaqtyq saýda portaly jumysyn bastady. Ol BUU-nyń eń joǵary marapatyna ıe bolyp, álemdegi eń úzdik aqparattyq saýda portaly dep tanyldy.
Qabyldanǵan barlyq shara syrtqy ekonomıkalyq qyzmettiń damýyna oń áser etedi. BUU-nyń sıfrlyq jáne turaqty tehnologııalardy paıdalana otyryp saýdany jeńildetý jónindegi jahandyq zertteýine sáıkes Qazaqstan 2023 jyly saýdany ońtaılandyrý salasyndaǵy óziniń jalpy kórsetkishin 76,34%-ǵa deıin jaqsartty (2015 jyly – 36,56%).