Adal eńbek ótemi – laıyqty jalaqy

Bul rette Energetıkter kásip­odaǵynyń tóraǵasy Orazbek Bekbas: «Áleýmettik seriktester arasynda bári ashyq jáne pragmatıkalyq turǵyda bolýǵa tıis. Taraptardyń keý­dem­soqtyqqa jol berýine oryn joq. Bul salalyq deńgeıde de, eldik deńgeıde de solaı bolýǵa tıis. Qu­jat­ty qabyldaǵanǵa deıin oǵan qol qoıý­shylardyń umtylysyn, ynta-yqylasyn anyqtaý úshin aldyn ala jumystar júrgiziletini túsinikti jaıt. Qazirdiń ózinde osy deńgeıde seriktester taraptardyń múddelerin eskeretin belgili bir ymyraǵa kelýi kerek. Demek, ózara túsinistikke degen jol da osydan bastaý alady. Onyń ústine kásipodaqtar bir maqsattaǵy kelisimderdiń barynsha áleýmettik baǵytqa ıe bolǵanyn qalaıdy», deıdi.

Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıte­tinde aımaqtyq elektr jelileri kompa­nııa­­larynyń qyzmetterine tarıf deńgeıin belgilegen kezinde eńbek naryǵyndaǵy ahýalǵa jáne óńirler­degi qyzmetkerlerdiń eń­bek­aqysyn tó­leýge baǵdarlanýy qajet bolǵan. Ata­l­ǵan mınıstrlik 2019 jyldyń 19 qarashasyndaǵy buıryǵymen bekitilgen tarıfterdi qalyptastyrý qaǵıdalaryndaǵy «Ekonomıkalyq qyzmet túrleri boıynsha» degen sózdi alyp tastaýdy energetıkter kásipodaǵy usynyp otyr.

Kásipodaq salasynyń basshy­sy: «Bir qaraǵanda, zııany joq bolyp kórinetin bul sózder elimizdiń salalyq kásipodaqtyń barlyq jum­saǵan kúsh-jigerin tolyǵymen joıdy. Energetıkterdiń materıaldyq jaǵdaıyn jaqsartýdaǵy ınstansııa­larǵa jazylǵan 60-tan asa hat, otan­dyq Elektr energetıkalyq qaýym­dastyǵymen birge de, bólek te jazylǵan 20 ótinish, sansyz kezdesýler men BAQ-taǵy 30-dan asa sóılengen sózder bar. Jylyna jasalatyn tarıfterdi túzetý sanyna qatysty shekteýlerdi alyp tastaý jáne tarıfterdi qaraý kezinde kásiporyndar qyzmetkerleriniń naqty sanyn emes, normatıvtik sanyn eskerýi kerek», dep otyr.

Jalpy, elimizdegi atalǵan salalyq kásipodaq uıymy birneshe jyldan beri energetıkterdiń jaǵdaıyn bı­likke jetkizýdi qanshalyqty qalasa da, jarty joldan qalyp qoıatyn­dyǵyn, jeke bastyń sharýasy emes, jumysshylardyń aımaqtardaǵy basqa óndirýshilermen jalaqy jaǵy­nan teńestirý mańyzdy ekenin, Mono­polııaǵa qarsy agenttik mamanda­ry jaǵdaıdy túsingen syńaı tanyt­qa­ny­men, respýblıkalyq mańy­zy bar úsh megapolıstegi elektr jelisi kompanııalaryndaǵy jumysshylar­dyń ortasha jalaqysyna kelisip, biraq maǵynasyn ózgertken, jum­saǵan eńbektiń baǵalanbaǵanyn aıtady.

«Memleket basshysy kóterińki tarıfti qoldanýǵa buıryq berdi. Bun­daǵy alynǵan paıdany negizgi aktıvti jańǵyrtýǵa jáne jóndeýge, sondaı-aq kadrlardy bekitýge ba­ǵyttaý kerek. Bul birinshi kezekte kásiporyn qyzmetkerleriniń jala­qysy laıyqty deńgeıde bolý­ǵa tıis degendi bildi­redi. Biraq kásip­oryndarda ony qol­da­nylýyna tıisti baqylaý bolǵan emes. So­nyń saldarynan keıbir basshylar alyn­ǵan paıdany maqsatsyz paıdalanýǵa jol berdi. Árıne, ol ju­mys­shylardyń jalaqysyn kóte­rýge baǵyttalmaǵan. Sondyqtan biz qa­zir osy baǵdarlamany júzege asy­rý­ǵa qatysatyn kásiporyndardyń kásipodaqtar uıymy alynǵan paı­­da­­nyń qoldanýyn baqylaý jó­nindegi jumys komıssııasyna qo­sýdy usynyp otyrmyz. Bul – ju­mys­shylar úshin óte mańyz­dy, son­dyqtan biz osy usy­nysymyz­dyń Bas kelisimge engizil­genin qalaımyz», deıdi O.Bekbas.

Ázirge energetıkterdiń materıal­dyq jaǵdaıyn jaqsartý kún tártibi­nen túspeı tur. Ulttyq statıstıka bıýrosynyń deregi boıynsha 2023 jyl­dyń ekinshi toqsanynda jalaqy­nyń ortasha máni 2022 jyldyń tıisti toqsanymen salystyrǵanda 17,1 paıyzǵa ósip, 365 502 teńgeni quraǵan. Onyń ústine energetıkterdiń ortasha jalaqysy 304 712 teńge shamasynda toqtap, ortasha respýblıkalyq jala­qydan 17 paıyzǵa artta qalǵany bar. Bul sol kezeńde jylý men elektr energııasyn óndirýshi jáne taratýshy kásiporyndarda jalaqy orta eseppen 20,6 paıyzǵa kóterilgen edi.

Osylaısha, elimizdiń sala­lyq energetıkter kásipodaǵy óz usynys­taryn jetkizdi. Árıne, atalǵan jaı­dyń jańǵyryǵynda elektr energetıkasy salasyndaǵy qyzmetkerlerdiń eńbek quqyqtary men áleýmettik múddeleri qorǵalýǵa tıis.