Áskerı ómirdiń aınasyna aınalǵan aıbyndy tulǵa Saǵadat Nurmaǵambetovtiń týǵanyna bıyl 100 jyl. El tarıhynda esimi altyn árippen qashalǵan qaıratker táýelsiz Otanymyzdyń tuńǵysh Qorǵanys mınıstri, armııa generaly, el tynyshtyǵyn kúzetip sapta turǵan san myń sarbazdyń úlgi tutar tulǵasy.
Almatydaǵy Memlekettik ortalyq mýzeıde esik ashqan «Halyq júregindegi qaharman» dep atalǵan kórmeni tamashalap, Saǵadat álemine saıahattap qaıttyq. Jastardyń jigerin janyp, rýhyn kóteretin mazmundy is-sharany taǵylym ordasy Qarýly kúshterdiń áskerı-tarıhı mýzeıimen birlese uıymdastyrǵan.
Kóshpeli kórmege Halyq qaharmanynyń tirshiliginde tutynǵan jeke zattary, esh jerde jarııalanbaǵan fotosýretteri men qujattary, batyrdyń ómirine qatysty biregeı jádigerler qoıylǵan. Mundaǵy 100-den asa eksponattyń árbiri generaldyń ómir belesterinen habar beredi. Ásirese onyń 1943 jyly ásker sapyndaǵy sarbaz sátinde taspalanǵan sýreti, maıdandaǵy erligi úshin 1945 jyly Keńes Odaǵynyń batyry medalin alyp turǵan kezin beıneleıtin estelik sýret birden nazar aýdartady. Batyrdyń týǵan jeri, ósken ortasy týraly keń aýqymdy málimetterdi, ol týraly jazylǵan kitaptar men maqalalar tizbegin de kórme tórinen tabasyz.
Kórmeniń ashylý saltanatyna Saǵadat Qojahmetulymen qyzmettes bolǵan ardagerler, «Jas sarbaz» áskerı-patrıottyq synybynyń tárbıelenýshileri jáne áskerı qyzmetkerler qatysty. Batyr rýhyna arnalǵan patrıottyq ánder shyrqalyp, jas sarbazdar jyrdan shashý shashty. Armııa generalynan taǵylym alǵan áskerı sala ardagerleri onyń adamı bolmysy men qaıratkerlik qyry haqynda estelikterimen bólisti.
«О́negesi elge mura, urpaqqa uran bolǵan Halyq qaharmany Saǵadat Nurmaǵambetovtiń esimi áskerı sala mamandarynyń aýzynda ańyzdaı aıtylýy tegin emes. Ol kisiniń batyldyǵy, qaısarlyǵy, eline degen súıispenshiligi – jastarymyzǵa jarqyn úlgi. Atalǵan kórmeden óskeleń urpaq shabyt alyp, Otan qorǵaýdyń mán-mańyzy, elge qyzmet etýdiń ónegesi týraly oı qalyptastyrsa deımiz. Kórmege qatysqan jas sarbazdardyń kózinen osyndaı ushqyn kórdik», deıdi Memlekettik ortalyq mýzeı dırektory Rashıda Harıpova.
Kóshpeli kórme ortalyq mýzeıde on kúnge jalǵasyp, artynsha el aımaqtaryn aralamaq. Memlekettik áskerı-tarıhı mýzeıdiń qyzmetkeri Dáýlet Qadyrov tulǵanyń ǵasyrlyq toıyna oraı elimizdiń ár óńirinde osyndaı aıshyqty jobalar saltanat quratynyn, úlken qalalarda ótetin negizgi is-sharalardyń bárine mundaǵy mańyzdy jádigerler aparylatynyn jetkizdi.
«Búgingi is-shara Saǵadat Qojahmetulynyń eren eńbegin úlgi ete otyryp, urpaqqa áskerı-patrıottyq tárbıe berýge, sondaı-aq, el Qarýly kúshteriniń ımıdjin arttyrýǵa, mýzeı isin nasıhattaýǵa jáne odan ári damytýǵa baǵyttalyp otyr», deıdi ol.
ALMATY