Ádilet mınıstrligi respýblıkalyq Jeke sot oryndaýshylar palatasymen birlesip, Taraz qalasynda jeńildetilgen atqarýshylyq isti júrgizýdi engizý boıynsha qanatqaqty jobany iske qosty.
Osyǵan deıin azamattar salynǵan aıyppuldy ýaqytynda óteı almaǵan jaǵdaıda aıyppuldyń 25 paıyzǵa deıingi somasyn jeke sot oryndaýshyǵa tóleýge mindetti bolatyn. Endi bul qyzmetti robot tegin-aq atqarady. Jańa jobanyń nátıjesinde el azamattary 2 mlrd teńgege jýyq somany únemdeı alady.
Júıe algorıtmi kelesideı tártippen jumys isteıdi: aldymen Bas prokýratýranyń Quqyqtyq statıstıka jáne arnaıy esepke alý jónindegi komıteti 50 kún ishinde tólenbegen ákimshilik quqyq buzýshylyq úshin aıyppul somasyn óndirip alý týraly uıǵarym jiberedi. Budan keıin robot 5 kúntizbelik kún ishinde talapty oryndaý qajettigi týraly SMS habarlama jóneltedi. Úshinshi qadam – aıyppul boıynsha erikti tólem bolmaǵan jaǵdaıda, júıe jeke sot oryndaýshysyna májbúrlep oryndaýǵa atqarý paraǵyn usynady. Tórtinshi qadam – tólem ýaqtyly júrgizilse, atqarýshylyq is júrgizý artyq shyǵynsyz toqtatylady.
Joba sátti júzege asatyn bolsa, ony tutastaı el aýmaǵyna engizý josparlanyp otyr.