19 qańtar kúni Ulttyq ulannyń 6636 áskerı bólimine ótken jyldyń sońynda qosylǵan sarbazdar Áskerı ant qabyldady. Áskerı bólim aýmaǵynda Qaraǵandy, Ulytaý, Mańǵystaý, Shyǵys Qazaqstan, Abaı jáne Pavlodar oblystarynan kelgen 130-dan astam jaýynger sap túzedi. Bul rásimdi tamashalaýǵa sarbazdardyń ata-analary men baýyrlary jáne týystary jınaldy, dep jazady Egemen.kz.
Saltanatty jıynda Memlekettik týdy kóterý quqyǵyna oqý pýnktiniń eń úzdik sarbazy qatardaǵy jaýynger Nartaı Muzdybaev ıe boldy. Ánuran oryndalǵannan keıin jas jaýynger kýrsynan ótken sarbazdar Otan aldynda adal qyzmet etýge ant etti.
Osydan soń quttyqtaý sóz 6636 áskerı bóliminiń komandıri polkovnık Erlan Býranbaevqa berildi.
- Sarbazdarymyzdyń ant qabyldaıtyn kúni biz úshin merekemen para-par. Sender alǵash ret Áskerı ant qabyldap otyrsyńdar. Bul sát senderdiń esterińde máńgi saqtalady. Ár azamat elimizdiń konstıtýsııasyn jáne onyń talaptaryn este saqtaýy kerek. Qazaqstandy qorǵaý – senderdiń qasıetti boryshtaryń. Sondyqtan áskerı qyzmetterińdi abyroımen atqarýlaryńa tilektespin. Senderdeı azamattardy tárbıelegen ata-analaryńa alǵysym zor, – dedi polkovnık Erlan Kárimjanuly.
Jalyndy jastar aldyna shyqqan 6636 áskerı bólimi ardagerler keńesiniń tóraǵasy Felıks Dýlskıı Áskerı anttyń qadir-qasıeti jaıly sóz qozǵady. Sondaı-aq antyna adaldyq tanytyp, qyzmet barysynda erlikpen qaza tapqan jaýyngerlerdiń batyldyǵyn úlgi etti. Bir sapta turǵan sarbazdardyń urpaqtan-urpaqqa jalǵasqan erlik saltyn jalǵaıtynyna senim bildirdi.
Is-sharada qatardaǵy Álı Tóleýhan men Maǵjan Muhıtulynyń atasy Tóleýhan Qajy sóz sóıledi.
- Sarbazdar! Balalarym, Otan aldyndaǵy azamattyq boryshtaryńdy abyroımen atqaryńdar. Ata-analaryńnyń júzin jerge qaratpaýǵa tyrysyp, anttaryńa adaldyq tanytyńdar. Burynǵy batyrlardyń jolyn jalǵap, bıikten kórine berińder. Biz senderdi maqtan tutamyz! – dedi sóz sońyn batamen aıaqtaǵan qarııa.
Al jaýyngerler arasynan qatardaǵy Ádil Qaısanov lebiz bildirdi.
- Búgin egemen elimizdiń bolashaǵy úshin, táýelsiz Qazaqstan úshin Áskerı ant qabyldadyq. Biz rýhty jáne qaısar jaýynger bolýǵa sóz berdik. Ulttyq ulan sapynda qyzmet etý – biz úshin mártebe, al ata-analarymyz úshin úlken qýanysh, - dedi qatardaǵy Ádil Qaısanov.
Jaýyngerdiń adýyndy sózin ary qaraı qatardaǵy jaýynger Nursultan О́mirzaqtyń ákesi Urys-qımyldarynyń ardageri Dáýletkeldi Elýbaev jalǵap áketti. Qurmetti ardager aýǵan-tájik shekarasynda atqarǵan qyzmeti jaıly baıandap, jas sarbazdardy jigerli bolýǵa shaqyrdy.
Osydan keıin sarbazdar ata-analarynyń aldynda jekpe-jek urys tásilderiniń qımyl-qozǵalysyn kórsetti. Ásirese, Ulttyq ulan qurmet qaraýyl rotasynyń óneri kóptiń kóńilinen shyqty.
Saltanatty sharanyń sońynda sarbazdar men ata-analardyń jolyǵýyna ruqsat etildi.