Qoǵamnyń jegi qurtyna aınalǵan sybaılas jemqorlyqpen kúres jalǵasa beredi. Bul máselege memlekettik mekemeler de, azamattarymyz da beıjaı qaramaýǵa tıis. Osy oraıda jemqorlyqqa qarsy kúres Soltústik Qazaqstanda júıeli júrgizile bastady.
«Sybaılas jemqorlyqpen kúreste biz qazir jemqorlyqtyń saldaryn ǵana emes, ony týdyratyn sebepterdi de joıýǵa tyrysamyz. Bul jumys áleýmettik mańyzy zor máselelerden turatyn «Sybaılas jemqorlyq táýekelderi kartasy» aıasynda júzege asyrylyp jatyr», dedi jýrnalıstermen kezdesken oblystyq jemqorlyqqa qarsy kúres departamenti basshysynyń birinshi orynbasary Aıdos Júnisov. Osy kúrestiń mysaldary qatarynda ol shekaralyq beketterden syrtqa shyǵarýǵa ýaqytsha shekteý qoıylǵan taýarlarǵa baqylaý jasalǵanyn alǵa tartty. Onyń ishinde túrli maldar, kómir, tústi jáne qara metall synyqtary, qubyrlar men relster bar.
A.Júnisovtiń sózine súıensek, veterınarlyq baqylaý óz qyzmetin jiti, qalypty atqarmaıdy. Olardyń keıbireýi elge engizýge bolmaıtyn ónimderdi tasymaldaıtyn kásiporyndarǵa «janashyrlyq» kórsetip, múddelerin qorǵaǵan. Sonyń kesirinen mysaly, ótken kúzde dúken sórelerinde sanıtarlyq súzgiden ótpegen reseılik shoshqa eti, sondaı-aq naryqta jem azyqtar paıda bolǵan. Degenmen osyndaı buzýshylyqtarǵa jol bergen veterınarlyq baqylaý beketteriniń ataýy jáne olarǵa qandaı sharalar qoldanylǵany aıtylmady.
Bir qyzyǵy, soltústikqazaqstandyq antıkor qyzmeti qorshaǵan ortaǵa zııan keltirgen 206 kásiporynnyń bıýdjetke tólegen 96 mln teńgesin ózderine qaıtartypty. О́ıtkeni qarjy qate tólengen.
О́tken jyldyń qorytyndysy boıynsha sybaılas jemqorlyqqa qarsy kúres departamenti 201 mln teńge qarjyǵa qatysty zań buzýshylyqty anyqtap, onyń 124 mln teńgesin memlekettiń jáne menshik ıesiniń esebine qaıtartqan.
A.Júnisovtiń baıandamasyna qaraǵanda, Antıkor «EOZ» júıesi arqyly 58 bıýdjettik mekeme túrli taýarlardy satyp alý baǵasyn 1,8 mlrd teńgege arttyryp jibergenin anyqtaǵan. Onyń ishinde bilim berý salasy 16 jaǵdaıda baǵany 480,6 mln teńgege negizsiz arttyrǵan. Al oblystyń qarjy basqarmasy bar-joǵy 24 myń teńgege satyp alynatyn jýrnaldardyń baǵasyn 1 mln 368 myń teńgege satyp alýdy josparlap qoıǵan. Sóıtip, baǵany 57 ese ósirip jibergen. «Aqan seri» orman sharýashylyǵy mekemesi bir lıtr A-92 janar-jaǵarmaıyn 16 696 teńgege almaq bolyp, josparǵa engizip qoıǵan eken. Antıkordyń aralasýymen bul joly 664,5 mln teńge bıýdjet qarajaty únemdelgen. Aıyrtaý aýdanynyń bilim bólimi de jylý qazandyqtaryn satyp alý baǵasyn shekten tys arttyryp jibergen, tipti bul somany bıýdjettiń shyǵysyna engizip qoıypty. Olar naryqta 30,7 mln teńge turatyn bir qazandyqtyń baǵasyn 307,6 mln teńge dep kórsetken eken. Árıne, mundaıdyń qatelikten ketýi de múmkin, biraq satýshymen sybaılasyp, artyq aqshany bólý de qylań berip qalatynyn jasyryn emes. Osyndaı jaǵdaı Jambyl aýdanynyń Presnov aýyldyq okrýgi ákimdiginiń apparatynda da tirkelgen. Olar kádimgi uzyn oryndyqtardyń baǵasyn 7,5 mln teńge dep kórsetip, bıýdjet qarajatyn shyǵyndamaq bolǵan. Alaıda Antıkor aralasqan soń onyń 6,7 mln teńgesi bıýdjet esebine qaıtarylǵan.
Soltústik Qazaqstan oblysy