Astanada aýyl mektepteri oqýshylaryna arnalǵan respýblıkalyq pándik olımpıadanyń qorytyndy kezeńi ótip jatyr. Aqtyq synǵa 1 myńnan astam zııatker joldama alǵan. Bilim básekesi 25 qańtarǵa deıin jalǵasady.
Oqý-aǵartý mınıstrliginiń bastamasymen ótken olımpıada alǵash ret uıymdastyrylyp otyr. Maqsat – aýyl men qala mektepteriniń arasyndaǵy alshaqtyqty azaıtý ári oqýshylardyń zeıinin arttyrý. Mınıstr Ǵanı Beısembaev pándik olımpıadalardyń oqýshylar úshin mańyzyn bylaısha túsindirdi: «Pándik olımpıada – balalardyń sanasynda alǵashqy ǵylymı izdenisterge jol salatyn, bolashaq ǵalymdardy shabyttandyratyn, ǵylymmen erkin aınalysatyn jastar tobyn qalyptastyratyn eń aýqymdy baǵdarlamalyq saıys. Mektep oqýshylarynyń bedeldi olımpıadalarǵa qatysý reıtıngi jeńis qorjynynda medaldar sanynyń kóbeıgenin, bilim sapasynyń artqanyn kórsetedi».
«Daryn» respýblıkalyq ǵylymı-praktıkalyq ortalyǵynyń dırektory Ǵajdembek Tursynovtyń aıtýynsha, olımpıadaǵa aýyl mektepteriniń 9-11 synyp oqýshylary qatysyp jatyr. Osylaısha, elimizdiń shalǵaı eldi mekenderindegi daryndy jáne talantty balalardyń qabiletterin anyqtap, damytý, halyqaralyq olımpıadalarǵa qatysýǵa yntalandyrý kózdelip otyr. «Respýblıkalyq olımpıadalarda akademııalyq adaldyqty qamtamasyz etý úshin tapsyrmalar ár qatysýshyǵa elektrondy túrde jeke-jeke jiberiledi. Olımpıadanyń barlyq kezeńinde oqýshylardyń aty-jóni kórinbeıdi. Ár kezeńnen keıin tapsyrmalardyń skanerlengen nusqasy, qatysýshylardyń jumystary men durys jaýaptar ortalyqtyń saıtynda jarııalanady», dedi Ǵ.Tursynov.
Irikteý kezeńi ótken jyldyń qarasha aıynda bastalǵan. Olımpıada jaratylystaný-matematıkalyq jáne qoǵamdyq-gýmanıtarlyq baǵyttardy qamtıtyn 13 pán boıynsha ótkiziledi. Bastapqy kezeńge qatysý úshin oqýshylar auyl.daryn.kz saıtynda tirkelýden ótti. Nátıjesinde, 90 myńnan astam oqýshy qatysýǵa nıet bildirgen. II irikteý kezeńi jeltoqsan aıynda ótkizilip, tapsyrmalar onlaın-platformada berildi. Al qorytyndy kezeń Astanada ótip jatyr. Oǵan ekinshi kezeńnen ótken 1088 oqýshy qatysyp jatyr. Qoǵamdyq-gýmanıtarlyq baǵyttaǵy pánder boıynsha olımpıada 21-25 qańtar aralyǵyna josparlanǵan. Al 5 kúnge sozylǵan jaratylystaný-matematıka baǵytyndaǵy saıys óz máresine jetip te úlgerdi.
Júldeli oryndarǵa ıe bolǵan oqýshylardyń tolqynysy men qýanyshyn kórgende olımpıadanyń aýyldaǵy oqýshylarǵa úlken múmkindik syılaǵanyn baıqadyq. Batys Qazaqstan oblysy Terekti aýdany Shaǵataı aýylynyń 11-synyp oqýshysy Dáýren Temirbolat respýblıkalyq kezeńge joldama alamyn dep oılamaǵanyn aıtty.
– Eki kezeńnen ótip, Astana qalasyna keldim. Respýblıkalyq synda geografııa páni boıynsha 3-oryn ıegeri atandym. Bul men úshin úlken qýanysh, úlken dáreje. Bizdiń aýyldan respýblıkalyq deńgeıde nátıje kórsetken alǵashqy oqýshy bolyp otyrmyn. Degenmen tańdaý pánim geografııa bolǵandyqtan qorytyndy kezeńniń tapsyrmalary maǵan qatty qıyn bolmady. Jaqsy daıyndyqpen keldim. Tek shamaly qobaljý boldy. Olımpıada óte joǵary deńgeıde uıymdastyrylǵan. Mundaı is-sharalar jıi uıymdastyrylyp tursa deımiz. О́ıtkeni bul biz úshin óte jaqsy múmkindik. Osy saıystyń nátıjesinde jańa dostar taptym, keremet kóńil kúı syılap jatyr, tanymymyz keńeıdi. Bul jarysta oryn almasam da esh ókinbeıtin edim. Qatysýdyń ózi úlken abyroı, – deıdi Dáýren.
Al matematıka páni boıynsha 2-orynǵa ıe bolǵan Jambyl oblysy T.Rysqulov atyndaǵy mektep-lıseıiniń 11-synyp oqýshysy Jankeldi Baıkeıdiń aıtýynsha, naǵyz bilimdi, daıyndyǵy myqty oqýshy mindetti túrde júldeli oryndardan kórinedi.
– 90 myń adamnyń arasynan iriktelinip, olımpıadaǵa qatysýǵa múmkindik aldym. Sol kezden bastap aldyma maqsat qoıyp, tórt aı boıy daıyndaldym. Endi, mine, nátıjesin kórip otyrmyn. Alaıda bul jarysqa áýeli moraldyq turǵyda daıyndalýym kerek dep oıladym. Sebebi munda jeńis te, jeńilis te bolady. Oǵan turaqty daıyndyq kerek. Menińshe, bul olımpıadanyń úlken artyqshylyǵy – aýyl men qala mektepterindegi alshaqtyqty joıýǵa múmkindik berýinde. Sondaı-aq aýyl oqýshylarynyń ózine degen senimdiligin arttyryp, talantty jastardyń kóp ekenin dáleldeı tústi. Men Prezıdent Qasym-Jomart Toqaevtyń «elimiz IT memleketke aınalýy kerek» degen ustanymyn tolyq quptaımyn. Sonyń negizinde IT salasyndaǵy myqty maman bolǵym keledi, – dedi júldeger oqýshy.
Marapattaý saltanatynda Oqý-aǵartý birinshi vıse-mınıstri Natalıa Jumadildaeva júldegerler arasynda elimizdiń abyroıyn álemdik deńgeıde kóteretin bolashaq myqty ǵalymdardyń baryna senim bildirdi. «Men sahnaǵa kóterilgen oqýshylarmen birge qobaljyp, birge qýanyp otyrdym. Sizderdiń ómirlerińizde osyndaı jarqyn jetistikter kóbeıe bersin. Tek aqyl men eńbekke senim arttyńyzdar», dedi ol oqýshylarǵa.
Uıymdastyrýshylardyń aıtýynsha, olımpıadanyń úshinshi kezeńiniń árbir qatysýshysy jeke jumys ornymen, jaýap paraqtarynyń blankilerimen, onyń oqý tilindegi tapsyrmalar mátinimen tolyq qamtamasyz etildi. Ashyqtyq pen akademııalyq adaldyqty saqtaý maqsatynda olımpıadanyń ótý barysy onlaın rejimde kórýge arnalǵan beınebaqylaý júıesimen qadaǵalandy.
Aıta keteıik, jaratylystaný-matematıka baǵyty boıynsha olımpıadanyń jeńimpazdaryn marapattaý saltanatynda Jambyl, Túrkistan, Abaı, Atyraý oblystarynan kelgen oqýshylardyń aty jıi ataldy. Jambyl oblysy T.Rysqulov aýdany T.Rysqulov atyndaǵy mektep oqýshylarynyń jetekshisi Dınara Nııazqulova aýyl mektepterindegi daryndy balalarǵa kóńil bólinip jatqany qýantarlyq jaıt ekenin atap ótti.
– Jambyl oblysynan respýblıkalyq kezeńge 28 oqýshyny alyp keldik. Bilim alýshylardyń birshamasy júldeli oryndarǵa ıe bolyp, tamasha nátıje kórsetti. О́te qýanyshtymyz. Balalardy daıarlaǵan muǵalimderine alǵys bildiremiz. Ári olımpıadany uıymdastyrýshylarǵa aýyl men qala arasyndaǵy alshaqtyqty joıý maqsatynda osyndaı bastama kótergeni úshin rızashylyǵymyz sheksiz, – dedi Dınara Nııazqulova.
Jaratylystaný-matematıka baǵytyndaǵy olımpıada qorytyndysy boıynsha jeńimpazdar men júldegerler anyqtalyp, Oqý-aǵartý mınıstrliginiń dıplomdarymen marapattaldy. Sondaı-aq jeńimpazdarǵa elimizdiń birqatar joǵary oqý oryndarynyń rektorlyq granttary tabystalady. Al qoǵamdyq-gýmanıtarlyq baǵyttaǵy pánder boıynsha olımpıada nátıjesi 25 qańtarda belgili bolady.
Aıta keteıik, III kezeńniń barlyq qatysýshysy «Daryn» respýblıkalyq syrttaı mektebine qabyldanady. Sonymen qatar I dárejeli dıplom ıegerleri 2024 jylǵy jalpy bilim beretin pánder boıynsha respýblıkalyq olımpıadanyń qorytyndy kezeńine qatysýǵa múmkindik alady.