Ultqa qyzmet qylý qareketpen ólshenedi. Qaraǵandy qalasyndaǵy №95 mekteptiń ınformatıka pániniń muǵalimi Birjan Baltabaıulynyń osy bir ıgi isine kópshilik súısinip otyr.
Qarapaıym muǵalim balalarǵa arnalǵan «Jeti qazyna» atty shaǵyn kitapshany jaryqqa shyǵarǵan. Onda jeti qazyna ataýlarynyń mánin ashatyn shaǵyn mátin men sýret bar. Baldyrǵan álgi sýretti boıaý arqyly shyǵarmashylyqqa boıyn úıretip, tanymyn keńeıte alady. Almatydaǵy «Algorıtm» baspasynan 1000 danamen jaryqqa shyǵypty. Áleýmettik jelidegi jarnama arqyly jartysyn satyp ta jibergen.
– Alǵashqy shaǵyn boıaý jýrnalyn shyǵardyq. Endi, «Alpamys batyr», «Qobylandy batyr», «Zarına patshaıym», «Tomırıs patshaıym» sekildi kitapshalarymyz daıyn tur. Ertegi negizinde ázirledik. Mátinin qurýǵa anam Altyn Tólepbergenqyzy atsalysty. Ol – qazaq tiliniń mamany. Qazir zeınette. Jobany jubaıym Erkejan Qýandyqovamen birlesip, pysyqtadyq. Áıelim – IT salasynyń ókili. Jyldam satylyp ketkenine qarap, ótimdi ekenin, suranysqa ıe ekenin túsindik. Balalaryn ulttyq tárbıege baýlıtyn ata-ana baryn bildik. Jobamyz qoldaý tapsa, ári qaraı jetildire bermekpiz, – deıdi B.Baltabaıuly.
Jańa jýrnaldary endi úsh tilde jaryqqa shyqpaq. Qazaq, orys jáne aǵylshyn tilinde. Qazaqy oıýlar toptastyrylǵan jınaqtary da bar. Boıaý jýrnaldarynyń sýretin salǵan – Gúlnur Erlanqyzy men Vılarom Baqytjanqyzy.
Mine, qaraǵandylyq jas muǵalim ınformatıka sabaǵyn ǵana ótkizip qoımaı, ult bolashaǵyna osylaı qyzmet etip júr.
Qaraǵandy oblysy