Oıǵa alǵan sharýanyń ońynan ońǵarylyp jatqany qandaı jaqsy. Shubar aýylynda 300 oqýshyǵa laıyqtalǵan jańa bilim oshaǵy esigin aıqara ashyp, ata-analardy bir qýantyp tastady.
Jalpy bilim beretin mektepte 12 pán kabıneti bar. Sondaı-aq keń de jaryq alty bastaýysh synyp kabıneti jumys isteıtin bolady. Qurylysshylar qalaǵynan jańa shyqqan sport pen májilis zaly, kitaphana aınadaı jarqyrap tur. Sóz arasynda aýyldyń 168 oqýshysy sonaý 1962 jyly salynǵan kónetoz mektepte oqyp kelgen bolatyn. Endi, mine, jańa toqsannyń basynda jan jadyratar jaqsylyq oryn aldy.
– Mektep ujymynda 34 muǵalim jumys isteıdi, – deıdi mektep dırektory Múbárak Baısholaqov. – Jańa bilim oshaǵy salyna bastalǵaly qurylys jumysy qashan bitedi eken dep taǵatsyzdana kúttik. Búgingi kún jalǵyz oqýshylar ǵana emes, ata-analardyń da mereıi ústem bolǵan sát.
Osyndaı jaǵymdy jańalyq Selınograd aýdanynyń birqatar eldi mekeninde oryn almaq. Aýdanda 10 bilim oshaǵy men bir balabaqsha salynyp jatyr. Aıtpaqshy, óńirde ótken jyly alty jańa mektep paıdalanýǵa berildi. Astana tóńiregindegi aýyldarda ornalasqan bilim oshaqtarynda úsh aýysymdy oqytý júıesi oryn alyp, halyqtyń ókpe-nazyn týdyryp tur edi. Jibek joly aýylynda 300 oryndyq, Qosshy qalasynda 1200 oryndyq mektepter salynǵannan keıin bul másele sheshimin tapty. Qosshy qalasynda jeke ınvestısııa esebinen salynǵan 1500 oryndyq mektep memleket menshigine berildi. Aqkól qalasynyń №4 mektebine qosymsha ǵımarat qosyldy.
«Jaıly mektep» ulttyq jobasy aıasynda óńirde 22 600 oqýshyǵa arnalǵan 18 mektep salý josparlanyp otyr. Búgingi tańda 7 mekteptiń qurylysy bastaldy.
Aqmola oblysy