Shyǵys Qazaqstan ormandy, taýly óńir bolǵandyqtan, jortqan ań, ushqan qusqa baı. Balyǵy taıdaı týlaǵan ózen-kólderi de az emes. Alaıda, zańsyz ańshylyq quryp, beı-bereket aǵash jyǵatyn, sý aıdyndaryna aý tastaıtyn qaskóılerdiń de aıaǵy tyıylmaı tur. Oblys polısııa qyzmetkerleri 2023 jyly 1300-den astam tabıǵatty qorǵaý zańnamasyn buzý faktisin anyqtaǵan eken.
Brakonerler jeke baıý maqsatynda tabıǵatqa ǵana emes, jalpy adamzatqa zııan keltiretinderin bir sát oılaı ma eken?
Quqyq qorǵaý organdary usynǵan statıstıkalyq derekterge kóz salsaq, 2023 jyly tabıǵatty qorǵaý polısııasynyń qyzmetkerleri 1 845 reıdtik is-shara ótkizip, tabıǵatty qorǵaý zańnamasyna sáıkes 1300-den astam quqyq buzýshylyqty anyqtapty. Onyń elýge jýyǵy qylmystyq quqyq buzýshylyq eken. Az emes.
Polısııa qyzmetkerleri balyq resýrstaryn, zańsyz ańshylyqty jáne «Qyzyl kitapqa» engen janýarlar men ósimdikterdiń sırek kezdesetin túrleriniń aınalymy salasyndaǵy quqyq buzýshylyqtardyń jolyn kesý maqsatynda júıeli jumys júrgizip otyr. Tergelip, núktesi qoıylǵan qylmystyq ister sotqa joldanyp, keıbir brakonerler tıisti jazasyn alyp ta úlgerdi.
Máselen, Altaı aýdanynyń 57 jastaǵy turǵyny 3 bulǵyndy zańsyz aýlaǵany úshin bir jylǵa bas bostandyǵynan shekteý jazasy kesildi. Sonymen qatar osy aýdannyń 30 jastaǵy turǵyny eki jylǵa bas bostandyǵynan aıyryldy. Ol Bogatyrevo aýlyndaǵy Buqtyrma ózeniniń arnasynda «Qyzyl kitapqa» engen taımen balyǵyn aýlaǵan eken. Glýbokoe aýdanynyń Cheremshanka aýylynda sırek kezdesetin jabaıy sarymsaq ósimdiginiń 4000-ǵa jýyq danasyn jınap, Rıdder qalasyna satý úshin barǵan oblystyń tórt turǵyny bas bostandyǵyn shekteýdiń túrli merzimine (1 jyl jáne 3 jyl) sottalǵany jáne bar. Keltirip otyrǵan bul faktiler basqalarǵa sabaq bolsa eken.
Osy oraıda polıseıler azamattarǵa zańsyz ań aýlaý úshin jaýapkershilik kózdelgenin qatań eskertedi. Eskertip qana qoımaı, ekologııany saqtaýǵa, tabıǵat pen janýarlar álemin qorǵaýǵa shaqyrady.
Shyǵys Qazaqstan oblysy