Atyraý oblystyq polısııa departamenti baspasóz qyzmetiniń málimdeýinshe 39 jastaǵy er adam 9 qańtarda iz-túzsiz joǵalǵan. Sodan beri izdeý jumystary toqtaýsyz júrgizilip jatyr, dep habarlaıdy Egemen.kz.
Departamenttiń málimdemesinde: «Jylyoı aýdanynyń turǵyny 9 qańtarda úıinen shyǵyp ketken. Sol kúni saǵat 22:30 shamasynda anasyna «Zırattyń janynda kele jatyrmyn. Adasyp kettim» dep habarlasqan», delingen.
Sodan keıin odan esh habar bolmaǵan, qaı baǵytqa ketkeni belgisiz.
«Izdestirý jumysyna Jylyoı aýdandyq polısııa jáne tótenshe jaǵdaılar bóliminiń, jergilikti atqarýshy organnyń qyzmetkerleri tartylǵan», dep habarlady departamenttiń baspasóz qyzmeti.