Sońǵy aptada Amerıka Qurama Shtattarynda kem degende 89 adam qaıtys boldy. Oǵan qaqaǵan qystyń sýyǵy sebepshi bolǵan, dep habarlaıdy Egemen.kz CBS News-ke silteme jasap.
Buqaralyq aqparat quraldarynyń habarlaýynsha, qaıtys bolǵandardyń kóbi Tennessı shtatynda tirkeldi. Onda 25 adam kóz jumǵan. Oregonda 16 azamat qaza tapty. Olardyń úsheýi aǵash qulaǵan sátte kólikte otyrǵan.
Illınoıs, Pensılvanııa, Mıssısıpı, Vashıngton, Kentýkkı, Vıskonsın, Nıý-Iork jáne Nıý-Djersıde qorqynyshty oqıǵalar tirkeldi. Qazirgi ýaqytta elde aýa raıy sýyq: qatty jel, qar men kóktaıǵaq.
Osyǵan deıin temperatýra keıbir sátterde mınýs 34,4 gradýsqa deıin tómendegeni týraly habarlanǵan. Kúnniń sýýy 12 qańtarda bastaldy.