Qyzylordaǵa Cheh Respýblıkasynan bıznes ókilderi kelip, óńirdegi ınvestısııalyq jobalarmen tanysty. Sheteldikter Syrdaǵy balyq ónimderin eksporttaý, energetıkalyq jobalar men munaı-gaz qubyrlary óndirisine qyzyǵýshylyq tanytyp otyr.
Cheh iskerlerimen kezdesken oblys ákimi Nurlybek Nálibaev qyzylordalyqtar jańa iskerlik baılanystar ornatyp, ózara tıimdi qarym-qatynastardy damytýǵa árdaıym daıyn ekenin aıtty.
Qyzylorda – aýyl sharýashylyǵy men ónerkásip salasy damyǵan, mıneraldyq shıkizat resýrstaryna baı agro-ındýstrııalyq óńir. Oblys aýmaǵynda Kishi Aral teńizi men Syrdarııa ózeninen bólek balyq aýlaý kásibi jolǵa qoıylǵan 201 kól bar. О́ńirde jylyna myńdaǵan tonna ónim óndiretin 10 balyq óńdeý zaýyty jumys istep tur. О́tken jyly quny 8,3 mln dollar bolatyn 3,3 myń tonna balyq ónimderi eksporttaldy. Syr balyǵyn tutynatyn elder arasynda Eýropa men TMD memleketteri bar
– Energetıka salasyndaǵy sońǵy jańalyqtardyń biri – aımaqta jıyntyq qýattylyǵy 89 megavattyq 9 kún elektr stansasy jumys isteıdi. Onyń úsheýi shetel ınvestorlarynyń qatysýymen júzege asyp otyr. Sonymen qatar «Aksa enerdjı» túrik kompanııasy Qyzylorda qalasynda qýattylyǵy 240 megavattyq jylý-elektr stansasyn salyp jatyr. Onyń qýaty óńir suranysyn tolyq qamtıdy. Eksportqa baǵyttalǵan, óńdelgen otandyq ónimderge birqatar qoldaý sharalary bar. Syrtqy naryqqa shyǵarý úshin kásiporyndarǵa jan-jaqty servıstik qoldaý kórsetiledi, jol shyǵyndary 80%-ǵa deıin óteledi. Sizderge bolashaǵy bar jobalardy iske asyrýda múmkindiginshe jan-jaqty qoldaý kórsetemiz. Bizdiń óńirge kelgen saparyńyz Qyzylorda oblysy men Chehııa arasyndaǵy dostyq baılanysty odan ári ulǵaıatynyna senimdimin, – dedi oblys basshysy.
Investorlar usynylǵan jobalarǵa qyzyǵýshylyq tanytyp, aldaǵy ýaqytta atalǵan salalar boıynsha áriptestik ornatýǵa nıet bildirdi.
QYZYLORDA