El Prezıdenti Qasym-Jomart Toqaevtyń Italııaǵa resmı sapary aıasynda L.N.Gýmılev atyndaǵy Eýrazııa ulttyq ýnıversıteti, ıtalııalyq «Green spark italy srl» kompanııasy jáne Qazaqstannyń jasyl sýtegi odaǵy arasynda yntymaqtastyq týraly memorandýmǵa qol qoıyldy. Taraptar atmosferaǵa zııandy shyǵaryndylardy azaıtý úshin otynnyń jańa túrin óndirý tehnologııasyn ázirleýge nıetti.
«Natural Gas + H2» birlesken jobasy «jasyl sýtegi» óndirisin qurýǵa jáne ony tabıǵı gazben ońtaıly aralastyrýǵa baǵyttalǵan. Jańa tehnologııa atmosferaǵa bólinetin kómirqyshqyl dıoksıdi qaldyqtaryn azaıtýǵa jáne ekologııany jaqsartýǵa jol ashady. Ýnıversıtet ǵalymdary tájirıbelik-ónerkásiptik ýchaskede alynǵan nátıjeler boıynsha jańashyldyqty Almaty men Aqtaý qalalaryndaǵy jylý elektr ortalyqtaryna engizýdi usynatyn bolady.
«Eýrazııa ulttyq ýnıversıtetiniń ǵylymı áleýeti zor ári myqty kadrlary da jetkilikti. Biz ǵalymdarymyzdyń ǵylymı zertteýlerin qoldaýǵa basymdyq beremiz. Ýnıversıtet zertteýshileri ónerkásiptik kásiporyndardyń aýany lastaý deńgeıin tómendetý úshin ǵylymdy qajetsinetin jáne ekologııalyq taza jańa tehnologııalardy ázirleý baǵytynda belsendi eńbek etetinin atap ótkim keledi. Bizdiń professor Qaırat Kúterbekovtiń jetekshiligimen ǵalymdar toby alǵash ret elimizde sýtegi energetıkasy tehnologııalaryn damytý jobalaryna bastamashylyq tanytyp, olardy iske asyrdy. Bul memorandým sheńberindegi halyqaralyq yntymaqtastyq ekologııalyq taza sýtegin óndirý jáne paıdalaný baǵytynda qanatqaqty jobalardy qolǵa alýǵa múmkindik beredi. Birlesken kúsh-jigerimizdiń nátıjesi ekologııany edáýir jaqsartatyn jáne zııandy qaldyqtardy azaıtatyn otyn óndirisiniń jańa tehnologııalyq jelisiniń iske qosylýy bolady dep senemin», dedi ýnıversıtettiń strategııalyq damý jónindegi prorektory Dýman Aıtmaǵambetov.
Ýnıversıtet ǵalymdary sýtegi energetıkasy salasynda 15 jyldan beri ǵylymı qyzmetpen aınalysyp keledi. Bilim ordasynda Eýrazııalyq fızıka-energetıkalyq zertteýler jáne ǵylymdy qajet etetin tehnologııalar ınstıtýty tabysty jumys istep tur. О́tken jyly ýnıversıtet pen «Almaty elektr stansalary» AQ qorshaǵan ortany qorǵaý jáne gaz-sýtegi otynynyń qospasyn paıdalaný baǵytynda yntymaqtastyq pen ózara is-qımyl týraly memorandýmǵa qol qoıǵanyn aıta ketken jón.