Asyl tuqymdy sıyr fermasy

«Osy rette 100-den astam iri sút-taýar fermasy salynyp jat­qan Soltústik Qazaqstan obly­sy­nyń jetistikteri kópke úlgi. Sharýalardyń tájirıbesi mol, jemshóp qory da jetkilikti. Oǵan qosa baıypty qoldaý sharalary qolǵa alynǵan. Osynyń bári tu­ta­sa kele táp-táýir nátıje be­­rip otyr. Qus fabrıkalaryn, kó­kó­nis qoımalaryn, et ónimderin shy­ǵaratyn kásiporyndar salǵan kez­de osy tájirıbeni bas­shylyqqa alý kerek», dedi Prezıdent.

Mine, sol iri sút fer­ma­la­rynyń biri Nura aýda­nyna qarasty Kóbeteı aýylynda salynyp jatyr. Jylyna 10 myń tonna sút óndiredi. Jańa kásiporyn iske qosylyp, júzdegen jumys orny qurylyp, «eki qolǵa – bir kúrek» taba almaı júrgen aýyldaǵy aǵaıyn jumyspen qamtylady. Jańa keshen myń bas saýyn sıyrǵa arnalyp turǵyzylǵan. Kásiporyn aýyl turǵyndaryn qosymsha ju­mys ornymen qamtamasyz etip qana qoımaı, jergilikti ónim óndi­ri­sin de ulǵaıtady.

Ferma jańa agroónerkásiptik keshenderge jeńildikpen nesıe berýdiń memlekettik baǵdar­la­ma­sy boıynsha salynyp jatyr. Atalǵan nysannyń qurylýyna «Chernıgovskoe ı K» JShS jáne «Ramadan MF» JShS bastama­shy­lyq etip otyr.

Seriktestik buǵan deıin tek dándi daqyl ósirýmen aınalysqan. Ferma qurylysy byltyr bas­taldy. Qurylysshylar qysqa qaramaı jumystaryn atqaryp jatyr. Qajetti qurylys materıal­dary tolyq jetkilikti.

– Bul arada bes fermadan tura­tyn keshen, sondaı-aq jemshóp óndirýge arnalǵan súrlem alańy bolady. Kúzge deıin qurylys ju­mys­taryn aıaqtap, nysandy iske qosamyz degen josparymyz bar, – deıdi «Chernıgovskıı ı K» JShS-nyń basqarýshy menedjeri Arman Nurjanov.

Taýarly-sút fermasynda arnaıy astyq tazartqysh qoımasy qatar ornalasady. Bul jerge tamshylatyp sýarý júıesi ornatylady.

– Sút-taýar fermasyn salý ıdeıasy qyzmetimizdi ártarap­tan­dy­rý nıetinen týyndady. Biz – ósimdik ósirýshilermiz. Biraq jyl saıyn mono dán egýmen aına­ly­sý qıyndap barady. Son­dyq­tan «Ramadan MF» JShS-men birigip, Qaraǵandy oblysy men Astana shaharynyń sút óńdeý ká­siporyndaryn shıkizatpen qam­ta­masyz etetin zamanaýı taýarly-sút fermasyn qurý týraly sheshim qa­byl­dadyq, – deıdi «Cher­nı­gov­skoe ı K» JShS dırektory Aıdos Qanapın.

Fermaǵa jumystyń barlyq sıklin avtomattandyrýǵa múm­kin­dik beretin zamanaýı baǵ­dar­lama engizilmek. Kásipkerler Gol­shteın atty asyl tuqymdy sıyr ósirýdi qolǵa almaq nıette.

– Bul sıyrlar – eń sútti tu­qym­dardyń biri retinde belgili. Fer­manyń jobalyq qýaty – 1 100 bas. Kúnine 10 myń lıtrge deıin sút óndirýdi josparlap otyrmyz. Básekege qabiletti eńbekaqy tólenetin 60 jańa jumys ornyn quramyz. Birinshi kezekte aýyl turǵyndaryn jumysqa alamyz. Qazir olardyń kópshiligi amalsyzdyqtan elordada jumys istep júr. Bizdiń ferma jastarǵa qaladan jumys izdemeı, týǵan aýy­lynda turýǵa jáne jumys isteýge, eldiń ósip-órkendeýine úles qosýǵa, sonymen birge jaqsy ta­bys tabýǵa múmkindik beredi, – deıdi dırektor Aıdos Kanapın.

Taýarly-sút fermasy qajetti azyqpen ózin-ózi qamtamasyz etedi. Ol úshin sý tartý qurylysyn jáne sý qubyry jelilerin salý jobasy ázirlengen. Joba súrlemge jáne basqa da dándi daqyldarǵa ara­lastyratyn jasyl júgeri otyr­ǵyzý josparlanǵan 700 gektar alqapty sýarýdy kóz­deıdi. Joba «Bıznestiń jol kartasy» memlekettik baǵ­darlamasy bo­ıyn­sha qoldaý taýypty. Ká­sip­ker­ler ony júzege asyrýdy kútip otyr jáne aýstrııa­lyq «Bauer» fırma­sy­nyń alty shashyratqysh mashınasyn satyp alǵan.

– Bul – «Saryarqa» áleý­met­tik kásipkerlik korporasııa­sy qoldaǵan aýdandaǵy, tipti oblys­taǵy iri taýarly-sút fermasyn qurý boıynsha ınvestısııalyq jobalardyń biri. Bizdiń aýdanda qazir 30 basqa arnalǵan bir ǵana taýarly-sút fermasy bar. Jańa ferma agroónerkásiptik sektor men mal sharýashylyǵyn damytýǵa serpin beredi, – deıdi Nura aýda­ny­nyń aýyl sharýashylyǵy bóli­mi­niń basshysy Erbol Mámbetov.

Qaraǵandy oblysy,

Nura aýdany