Qyzmet barysynda erlikpen qaza tapqan órt sóndirýshi Asqar Zabıkýlınniń qurmetine taǵy bir eskertkish qoıyldy, dep habarlaıdy Egemen.kz Aqmola oblysy TJD baspasóz qyzmetine silteme jasap.
Is-sharanyń ashylý saltanatynda sóz sóılegen Tótenshe jaǵdaılar vıse-mınıstri Baýyrjan Syzdyqov memlekettiń strategııasy eń aldymen azamattardy qorǵaýǵa, tótenshe jaǵdaılardyń aldyn alýǵa jáne joıýǵa baǵyttalǵanyn aıtyp ótti. Osy rette ol qutqarýshylar men órt sóndirýshilerdiń eńbegi asa mańyzdy ekenin tilge tıek etti.
«Asqar Zabıkýlınniń erligi, onyń ómiri – patrıotızmniń, paryzdyń, qoryqpaýdyń úlgisi. Búgin alańǵa shyqqan órt sóndirýshilerdiń qazirgi býynyna qaraıtyn adam bar. Asqar Zabıkýlınniń esimi Tótenshe jaǵdaılar mınıstrliginiń ǵana emes, búkil elimizdiń tarıhynda jazylǵan. Onyń qaharman mysalynda jáne boryshy úshin óz ómirin qurban etken basqa qutqarýshylardyń mysalynda Qazaqstan Respýblıkasy azamattarynyń qaýipsizdigin adal jáne jaýapkershilikpen qamtamasyz etý úshin azamattyq qorǵaý organdarynyń júıesine keletin jastardyń jańa býyny tárbıelenetin bolady. Asqar týraly jaqsy estelik, óz isiniń mamany retinde bizdiń júregimizde máńgi qalady», dedi B.Syzdyqov.
Eskertkish taqtadan aq jamylǵy alynǵannan keıin, jınalǵandar memorıalǵa gúl shoqtaryn qoıyp, batyrdy bir mınýt únsizdikpen eske aldy.
«Aqmolalyq qutqarýshylar ótken jyly 300-den astam adamnyń ómiri men densaýlyǵyn saqtap qaldy. Sizderdiń janqııarlyq eńbekterińiz odan ári qaýipsizdik kepili bolatynyna senimdimin. Asqar Zabıkýlınniń ata - anasyna úlken alǵysymdy bildirgim keledi», dep atap ótti oblys ákiminiń orynbasary Eldos Ramazanov.
Asqar Zabıkýlın bıýstiniń bıiktigi 3,7 metrlik tuǵyrǵa ornatylǵan. Eskertkishtiń aınalasy abattandyrylyp, aǵashtarmen qorshalǵan.
Eske salaıyq, elordalyq órt sóndirýshi Asqar Zabıkýlın 2022 jyldyń qarasha aıynda turǵyn úı keshenindegi órtti sóndirý barysynda qyzmettik boryshyn óteý kezinde qaza taýyp, óz ómirin qaterge tigip, úsh adamnyń ómirin saqtap qalǵan bolatyn. Prezıdent Jarlyǵymen Asqar qaıtys bolǵannan keıin I dárejeli «Aıbyn» memlekettik nagradasymen marapattaldy.