2024 jyly Astanada birneshe aýqymdy halyqaralyq sporttyq is-shara ótedi. Elordanyń Kommýnıkasııalar qyzmetinde ótken brıfıngte qalalyq dene shynyqtyrý jáne sport basqarmasy basshysynyń m.a. Erkeǵalı Korbozov sportshylar daıyndyqty bastap ketkenin málim etti, dep habarlaıdy Egemen.kz Astana ákimdiginiń resmı saıtyna silteme jasap.
27 qańtarda elimizdiń bas shahary alǵash ret jeńil atletıkadan World Indoor Tour Gold – Astana Amoor meet for Amin Tuyakov Prizes serııasyndaǵy bedeldi jarystardy ótkizedi. World Indoor Tour Gold áıgili «Gaýhar lıga» serııasynyń analogy bolyp sanalady jáne jyl saıyn álemdegi eń úzdik sportshylardyń basyn qosady.
World Indoor Tour Gold kúntizbesine álemniń jeti qalasy ǵana kiredi:
- Astana, Qazaqstan (27 qańtar 2024 j.); - Ostrava, Chehııa (30 qańtar, 2024); - Boston, AQSh (4 aqpan, 2024); - Torýn, Polsha (6 aqpan, 2024); - Leven, Fransııa (10 aqpan 2024); - Nıý-Iork, AQSh (11 aqpan, 2024); - Madrıd, Ispanııa (23 aqpan, 2024).
Týrnırge álemniń 45 elinen 136 sportshy qatysady.
Elordada 1-5 aqpan aralyǵynda eresekter arasynda grek-rım jáne erkin kúresten el birinshiligi ótedi. Oǵan 17 oblystan jáne Almaty, Astana, Shymkent qalalary sportshylary qatysady.
Aıta ketsek, Naýryz merekesine oraı elordada birqatar jarystar josparlanǵan. Mysaly, sportshylar asyq atý, arqan tartý, armrestlıng, gir kóterý boıynsha synǵa túsedi.
Sondaı-aq naýryz aıynda kórkem gımnastıkadan halyqaralyq týrnır ótkizý josparlanyp otyr.
Bıyl «Qazaqstan Barysy Grand Slam 2024» álemdik týrnıri Almatydan Astanaǵa aýystyrylǵany málim. Jarys 10-12 mamyrǵa josparlanǵan.
V Dúnıejúzilik kóshpendiler oıyndaryn ótkizý jyldyń basty sporttyq is-sharalarynyń biri bolmaq.
Qarasha aıynda Astanada sambodan álem chempıonaty josparlanǵan.
Bıyl Astanada áıelder arasynda bokstan álem chempıonaty ótedi. Bul týraly О́zbekstan astanasy Tashkentte ótken Halyqaralyq boks qaýymdastyǵynyń (IBA) resmı otyrysynda habarlanǵan.