Memleket basshysy Qasym-Jomart Toqaev VIII shaqyrylymdaǵy Parlamenttiń birinshi sessııasynyń ashylýynda: «Bilim berý júıesindegi menedjmentti jaqsartýǵa basa mán berilýge tıis. Osy salaǵa naǵyz kásibı mamandardy tartý qajet. Bizde Prezıdenttik jastar kadr rezervi bar. Dál sol sııaqty bilim salasyna ózgeris ákeletin 1 myń maman arnaıy daıyndyqtan ótetin bolady», dep osyǵan oraı arnaıy baǵdarlama qabyldanatynyn aıtqany esimizde. Qazir sol joba iske asyrylyp, rezervke 208 kandıdat iriktelinip alynǵan. Mamandardyń qatary jyl saıyn tolyqtyrylyp otyrylady.
Memleket basshysynyń tapsyrmasy boıynsha Oqý-aǵartý mınıstrligi 2023 jyldan bastap prezıdenttik Jastar kadrlyq rezerviniń úlgisi boıynsha bilim berýdegi ózgerister kóshbasshylaryn irikteý jáne daıarlaý tetigin ázirleý ári bekitý jónindegi jobany iske asyryp jatyr. Bul joba bilim salasyn ilgeriletýge baǵyttalǵan. Sondyqtan mamandardy irikteýge jiti kóńil bólindi. Úmitkerlerdi irikteý jáne biliktiligin arttyrý boıynsha is-sharalardy Nazarbaev zııatkerlik mektepteriniń Pedagogıkalyq sheberlik ortalyǵy ótkizdi.
Pedagogıkalyq sheberlik ortalyǵynyń málimeti boıynsha, bastapqy kezeńde jobaǵa qatysýǵa 8 068 adam tirkelip, onyń 2 838-i testileýden ótti. Testileý nátıjesi boıynsha oqýǵa usynylǵan úmitkerlerdiń saralanǵan tizimi qalyptastyryldy. Olardyń arasynan iriktelgen 500-i arnaıy oqytýdan ótti. Ári qaraı baǵdarlamanyń ekinshi kezeńine sáıkes úmitkerlerdi irikteý úsh deńgeıli (bazalyq, ilgeri, kásibı) oqytý negizinde júzege asty. Oqytý barysynda top-menedjerler zamanaýı mekteptegi úrdister, muǵalimniń úzdiksiz damýy men kásibı ál-aýqaty, balaǵa qolaıly orta qurý, strategııalyq josparlaý, tabysty dırektor retindegi bedel, kásibı ekologııa, áleýmettik kapıtal jáne áleýmettik áriptestik, jobalyq menedjment, analıtıkalyq quzyretter syndy taqyryptardy tereńirek zerttedi.
Al úshinshi kezeńde – eldiń jetekshi mektepterinde taǵylymdamadan ótý, tórtinshi kezeńde – qorytyndy baǵalaý, qorytyndy kezeńde mınıstrlik janyndaǵy komıssııamen áńgimelesý boldy. Barlyq bes kezeńniń qorytyndysy boıynsha respýblıkalyq kadr rezervine 208 kandıdat qabyldandy.
Irikteýdiń barlyq kezeńinen ótkenderge sertıfıkat tabystaldy. Saltanatty rásim Astana qalasynda Oqý-aǵartý mınıstri Ǵanı Beısembaevtyń qatysýymen ótti. Mınıstr kadrlyq rezervke ótken úmitkerlerge arnaǵan sózinde otandyq bilim sapasyn arttyrý jáne pedagog kadrlardy kásibı daıarlaýdaǵy negizgi baǵyttardy atady.
– О́tken jyldyń basynda Oqý-aǵartý mınıstrligi elimizdegi bilim sapasyn odan ári arttyrý úshin 5 negizgi baǵytty aıqyndady. Olardyń ishinde menedjmentti nyǵaıtý jáne kadrlyq rezervti qalyptastyrý da bar. Memleket basshysynyń tapsyrmasy boıynsha biz «Jańa ózgeristerdiń 1000 kóshbasshysy» jobasyn iske qostyq. Bul – otandyq bilim júıesin damytýdyń jańa kezeńi. Segiz aıdyń ishinde sizder irikteýden ótip, jeke, kásibı, basqarýshylyq, analıtıkalyq daǵdylar men quzyretterińizdi damyttyńyzdar. Endi naǵyz kóshbasshylar retinde elimizdegi bilim berý júıesiniń sapasyn arttyrýǵa úles qosýlaryńyz kerek. Eń bastysy, balalarymyz ben pedagogterimizge jaıly jáne qaýipsiz orta qalyptastyrý, – dedi Ǵ.Beısembaev.
Atalǵan jobany sheteldik sarapshylar joǵary baǵalap, oń pikir bildirip otyr. Kembrıdj ýnıversıteti Homerton kolledjiniń professory Eleın Ýılsonnyń aıtýynsha, bul – kadrlyq rezervti daıyndaý boıynsha jasalǵan biregeı joba. «Atalǵan mańyzdy baǵytqa memleket Oqý-aǵartý mınıstrligi deńgeıinde kóńil bólip jatqany qýantady. Bul otandyq bilim berýde jaýapkershilik ala alatyn, bolashaǵy zor mamandardyń bazasyn qalyptastyrýdyń tıimdi joly», dedi ol.
Pedagogıkalyq sheberlik ortalyǵy dırektorynyń orynbasary Tolqyn Qaıyrbekqyzy oqytý barysynda qatysýshylardyń praktıkalyq turǵydan shyńdalǵanyn atap ótti. «Biz jaı teorııamen shektelmeı, sabaq úmitkerlerdiń «eger men osy teorııany mektepke baryp engizetin bolsam, ne ister edim, neni jaqsartýym kerek?» degen sııaqty refleksııalyq oılaý daǵdylaryn damytýǵa baǵyttaldy», dedi ol.
Barlyq kezeńniń qorytyndysy boıynsha kadr rezervine engen 208 kandıdattyń arasynda Astana qalasyndaǵy A.Seıdimbek atyndaǵy №54 mektep-lıseı dırektorynyń oqý-tárbıe isi jónindegi orynbasary Qaırat Muqashev ta bar. «Jobaǵa qatysý basqarý tásilimdi túbegeıli ózgertti. Men balalarymyzǵa qolaıly jaǵdaı jasaý jáne ujymmen birge qaı baǵytta damıtynymyz týraly oılana bastadym. Eń bastysy, bul joba áriptesterimniń bolashaqqa jáne óz kúshterine degen senimin arttyrdy», deıdi úmitker.
Kadrlyq rezerv baǵdarlamasynyń qatysýshysy Saıat Esembek te joba jańa izdeniske jol ashqanyn aıtty. «Biz oqytý kýrsynda «qazirgi mektep qandaı bolýy kerek?» degen suraqqa jaýap bere otyryp, mektepti basqarýdyń qazirgi zamanǵa saı formalaryn, tásilderin, quraldaryn qarastyrdyq. Bul aldaǵy ýaqytta tájirıbede qoldanatyn paıdaly bilim boldy», deıdi ol.
Tabystalǵan sertıfıkat negizinde úmitkerler konkýrstyq rásimderden ótpeı-aq birinshi basshynyń bos ornyna taǵaıyndalatyn bolady. Sondaı-aq olarǵa «Jetekshi-kóshbasshy» biliktilik sanaty beriledi. Jańa býyn menedjerleri jańa mektepterdi, onyń ishinde «Jaıly mektep» ulttyq jobasy aıasynda salynyp jatqan bilim oshaqtaryn kadrlyq jaǵynan qamtamasyz etýge jiberiledi. Aıta keteıik, bul joba bıyl da jalǵasady. Oǵan tilek bildirgen barlyq pedagog qatysa alady.