Sapaly bilim berý – ár muǵalimniń paryzy. Oqýshyny ǵylymǵa baǵyttap, iske qabiletti etý, izgi qundylyqtarǵa boılatý da sol paryzdyń ishine kiredi. Bul úrdis muǵalimge úzdiksiz damýdy, bilimin jan-jaqty jetildirýdi talap etedi. Ýshınskıı aıtpaqshy, «Muǵalim – óziniń bilimin úzdiksiz kóterip otyrǵanda ǵana muǵalim, al izdenýdi toqtatqanda onyń muǵalimdigi de joıylady». Osy tusta pedagogıkalyq menedjmenttiń tıimdi jumys isteý qajettiligi týady.
Ǵylymǵa súıensek, pedagogıkalyq menedjment mektep jumysyn basqarýdyń mazmuny men ádisterin, oqý-tárbıe jumysyn tıimdi uıymdastyrady. Bilim berýdiń paradıgmasy men basqarý teorııasynyń damýyna baılanysty pedagogıkalyq menedjment te qaıta jańaryp otyrady. Buǵan muǵalimderdiń ózara sabaqqa qatysýy kiredi. Iаǵnı júıe ustazǵa sabaq barysynda oqýshynyń is-áreketin tereń uǵyndyrady. Oqytýdyń ádis-tásilin jetildirý maqsatynda muǵalimniń is-tájirıbesin talqylaý arqyly keri baılanys berý tásili de tıimdi. Tájirıbeli muǵalimniń oqytý tásilin baqylaǵan ózge muǵalim de ustazdyq tynysyn asha túsedi.
Pedagogıkalyq ujymda jańa ınnovasııalardy qalyptastyratyn tájirıbe almasýlar jıi bolýy kerek. Bul úrdis júıeli júrgizilgen jaǵdaıda mekteptiń bilim sapasy artady. Negizinen atalǵan úrdis 1960 jyldary amerıkalyq ýnıversıtetterde qarqyndy bastaý alǵan. Kóp uzamaı muǵalimderdiń kásibı daıyndyǵynyń bir bóligine aınalǵan. Keıin Aýstralııa, Ulybrıtanııa, Kanada, Irlandııa, Fınlıandııa elderinde tájirıbe almasý retinde qoldanysqa ıe boldy. Árıne, bul úrdis elimizdiń bilim berý salasynda qoldanylyp júr. Degenmen de mektepte qalaı tıimdi paıdalanýǵa bolady degen oı týady. Osy turǵyda sabaqqa qatysýdyń jalpy modeli qajet.
Sabaqqa qatysýdyń ártúrli modeli men ony júzege asyrýdy basqarý muǵalimderdiń ózara sabaqqa qatysý qajettiligi men olardyń kásibı ósýine áser etedi. Osynyń bárin uǵynyp, qajettiligin sezingen kezde «Qazirgi kezde muǵalimderdiń ózara sabaqqa qatysýy qanshalyqty júrgizilip jatyr? Mektepte ózara sabaqqa qatysýdy qalaı tıimdi uıymdastyrýǵa bolady?» degen suraq týyndaıdy. Osy saýaldardy sheshý maqsatynda «Áriptespen ótken bir kúnim» jobasyn tájirıbege engizip, synap kórdim. Bul joba ózindik sanattar men júıeden turady. Refleksıvti ózara sabaqqa qatysý ustazdardyń kásibı damýyna serpin beredi. Muǵalimder arasynda áriptestik qoldaý nyǵaıa túsedi.
Márııam AMANGELDIQYZY,
Abaı atyndaǵy №87 mektep-gımnazııa dırektorynyń orynbasary
ASTANA