Parlament Májilisiniń depýtaty, Respublica partııasy fraksııasynyń múshesi Dınara Shúkijanova óz ókilettigin merziminen buryn toqtatatyn boldy, dep habarlaıdy Egemen.kz aqparat agenttigi.
Ortalyq saılaý komıssııasynyń resmı saıtyndaǵy aqparatqa súıensek, depýtat mandatyn tapsyrý boıynsha ótinishti ózi bergen.
Qazirgi tańda onyń ókilettigin merziminen buryn toqtatý týraly usynys Qazaqstan Respýblıkasy Parlamenti Májilisiniń qaraýyna engizildi.
37 jastaǵy Dınara Shúkijanova Qostanaı oblysynyń týmasy. 2011 jyly "Agromashholdıng KZ" AQ-ǵa jumysqa shaqyrylyp, 2022 jyly atalǵan kompanııanyń prezıdenti bolyp taǵaıyndalǵan. Qazaqstannyń isker áıelder qaýymdastyǵynyń múshesi bolyp tabylady. "Qazaqstannyń 100 jańa esimi "respýblıkalyq baıqaýynyń jeńimpazy.
Májiliste Ekonomıkalyq reforma jáne óńirlik damý komıtetiniń múshesi. Respublica partııasynyń negizin qalaýshylardyń biri.
Partııanyń baspasóz qyzmetiniń habarlaýynsha, Dınara Shúkijanova partııada qala beredi.