Jaqynda Astanada aýyl mektepteriniń oqýshylary arasynda jaratylystaný-matematıka baǵytyndaǵy pánder boıynsha respýblıkalyq olımpıada ótti. Sol bilim dodasynda qarqaralyq 11-synyp oqýshysy Aıdana Tólegen jeńimpaz atandy.
Tuńǵysh ret ótkizilgen bilim saıysyn Oqý-aǵartý mınıstrligi men «Daryn» respýblıkalyq ǵylymı-praktıkalyq ortalyǵy uıymdastyrdy. 9-11 synyp oqýshylarynyń bilimi synǵa túsken baıqaýǵa aýyldardan 1088 úzdik oqýshy qatysty. Aımaqtyq kezeńnen úzdik shyqqan oqýshylardy respýblıkalyq olımpıadaǵa «Saryarqa daryny» qosymsha bilim berý ǵylymı-praktıkalyq ortalyǵynyń ádiskeri Ásel Ramazanqyzy bastap bardy.
Respýblıkalyq báıgede Qarqaraly aýdany Besoba aýyly №8 tirek mektebiniń (resýrstyq ortalyq) 11-synyp oqýshysy Aıdana Tólegen geografııa páni boıynsha úzdik shyǵyp, birinshi oryndy ıelendi. Qazylardy ozyq bilimimen tánti etken ol baǵaly syılyqpen marapattaldy. Buǵan qosa, Semeıdegi Shákárim ýnıversıtetiniń bilim grantyna ıe boldy.
Aıdana – alǵyr oqýshy. «Daýys» debat klýbynyń úzdik spıkeri, aýdandyq pán olımpıadalarynyń, oqýshylardyń oblystyq ǵylymı-praktıkalyq konferensııasynyń júldegeri. Mektebiniń maqtanyshy. Onyń osyndaı jetistikke jetýine ákesi ári jetekshisi, Besoba mektebindegi geografııa pániniń muǵalimi Maqsat Rysbaevtyń sińirgen eńbegin de atap ótkenimiz jón. Maqsat Tólegenuly da – úzdik ustazdardyń biri. Ustazdyq jolda úlken jetistikterge jetken.
Zerek shákirt keleshekte IT salasynyń mamany bolǵysy keledi. Qazirdiń ózinde grant ıegeri atanǵan alǵyr oqýshynyń armany oryndalady degen senimimiz bar.
Qaraǵandy oblysy,
Qarqaraly aýdany,
Besoba aýyly