«Júregiń myqty bolý kerek. Apatqa túsken jandarǵa alǵashqy em-dom jasaıtyn – bizbiz. Kez kelgen jaǵdaıdy emosııaǵa berilmeı, salqyn qabyldaýdy úırenýge tıissiń. Áıtpese túrli jaraqat alǵandardy kórip, janyń túrshikse, qolyń dirdek qaǵady. Sol sebepti bizdiń jumys jumsaqtyqty qajet etpeıdi», deıdi Qaraǵandydaǵy Apattar medısına ortalyǵynyń qutqarýshy-dárigeri Almagúl Aldabekova.
Ras-aý, apat kezinde túrli aýyr jaraqat alǵan adam aldyńa kelgende abdyrap qalmaı, alǵashqy kómek kórsetý úshin júrektiń túkti bolmaǵy kerek. Almagúl Amangeldiqyzy ózine tıisti qyzmetti ábden meńgerip alǵan maman retinde abyroıly.
Jas talapker Almagúl Buqar jyraý aýdany Sýyq sý aýylyndaǵy mektepti úzdik bitirip, Qaraǵandynyń medısına akademııasyna oqýǵa túsedi. Tórt jyldyq bilimimen qosa, mamandandyrylǵan alǵashqy jedel kómek kórsetý boıynsha taǵy tórt aı biliktiligin jetildiredi. Alǵashqy eńbek jolyn Temirjol emhanasynda dáriger bolyp bastaǵan ol jedel járdemde de jumysyn jalǵastyrady. Keıin ózi tálim alǵan Qaraǵandy medısına akademııasynda alǵashqy jedel kómek kórsetý boıynsha stýdentterge dáris oqyp, bilgen-túıgenimen bólisedi. Tájirıbe, tálimin ábden jetildirip alǵan soń, qazirgi qyzmetine aýysady. Mundaı myqty medısına mamany Apattar medısına ortalyǵyna aýadaı qajet edi. Almagúl Amangeldiqyzy aq halatyn qutqarýshynyń formasyna aýystyra salýǵa birden kelisipti. Kelisken sebebin ózi bylaı túsindiredi:
– Akademııada alǵashqy jedel kómek kórsetýdi oqydyq. Myqty degen medısına mamandarynan tájirıbe túrinde úırendik. Keıin «Jedel járdemde» dáriger boldym. Odan soń stýdenttermen bilgenimdi bólistim. Ár dáris sabaǵyna tyńǵylyqty daıyndyqpen barý qajet. Sonyń arqasynda meniń de bilimim jetilip otyrdy. Birden qazirgi ortalyqqa qyzmetimdi aýystyrdym. Árıne, munda jumys isteý úshin ójettilik kerek. О́mir bolǵan soń, túrli qater de bolady. Sodan zardap shekkenderge em-dom jasap, janyn aman alyp qalýǵa kúsh salsaq degen nıet boldy mende.
Qaısar qyzdyń ortalyq qabyrǵasynda qyzmet etip jatqanyna bes jylǵa jýyqtapty. Tipti, Túrkııadaǵy zilzala kezinde qutqarý jumysyna qatysqan. Ondaǵy aýyr oqıǵany tereń tebirenispen eske alyp, áńgimelep berdi.
– Sol joly iriktelgen qurammen Túrkııadaǵy Nurdaǵy qalasyna ushyp bardyq. Biz Qazaqstan eliniń atynan keldik. Alǵashqy kúni kirpik qaqpaı jumys istedik. Balasyn izdep sharq urǵan anany, ákesin kútip otyrǵan balanyń zaryn estip, baspanasyz qalǵan, sharasyz kúı keshken eldi kórip, janymyzdyń jabyqqanyn nesine jasyraıyn? О́z-ózimizdi jınap, jumysymyzdy ármen jalǵadyq. Meniń jumysym – alǵashqy kómek kórsetý. Em-domymdy jasadym. Azan-qazan bolǵan jurttyń kóbiniń kúızelisten qan qysymdary túsip ketip jatty. Birine óksikten dem jetpedi. Sonyń bárine kómek kórsettik. 9 aqpan kúni Qaraǵandydan barǵan qutqarýshylar úıindi astynan úsh adamdy taýyp, aman alyp shyqtyq. Sonda bos kelmegenimizdi túsindik. Adamnyń ómirine arasha túsý – ol degen úlken nyǵmet. Janyn saqtap qalǵan saıyn biz keremet kúı keshemiz. Adam – eń qundy baılyq. Úlken baılyqqa kenelgennen de keremet áser alamyz, – deıdi qyzmetine adal Almagúl.
Almagúl Aldabekovanyń Túrkııadaǵy qutqarý jumysy kezindegi kúni-túni jasaǵan eńbegi elendi. Memleket basshysy qyzmettik boryshyn atqarýdaǵy janqııarlyǵy úshin «Erligi úshin» medalimen marapattady.
Ortalyqqa oıda-joqta túsetin dabyl damyl taptyrmaıtynyn aıtady. Kóbine jol apatyna túsken jandarǵa kómek kórsetipti. «Byltyr «Qaraǵandy-Almaty» kúre jolynda jan túrshigerlik jol apaty óte kóp boldy. Nege ekenin bilmeımiz, múmkin jol jóndelip jatqannan bolar, jaz boıy sonda júrdik. Dabyl túsken saıyn ortalyqtan tereń kúrsinip alyp shyǵamyz. Sosyn shydamdylyq tanytamyz. Aıtýǵa aýzymyz barmaıtyn túrli apattarǵa baryp, ondaǵy adamdardy alyp shyǵyp, medısınalyq kómek kórsetemiz. Ońaı emes», deıdi qutqarýshy-dáriger.
Almagúl Amangeldiqyzy – bir áýlettiń kelisti kelini. Tórt birdeı uldyń anasy. Joldasy Abaı Saǵatuly ishki ister salasynda eńbek etedi. «Ekeýmiz de eldiń amandyǵy úshin qyzmet etip júrgendikten, bir-birimizdiń janymyzdy túsinemiz, qoldaý kórsetemiz», – deıdi.
Úlken uldary Beksultan fagot aspabynda oınasa, Nurasyl dombyrany sheber tartady eken. Al Ádilbek esimdi balalary júzýge qatysady, shahmat oınaıdy. Kenjeleri balabaqshaǵa barady.
– Eki ulymyz ánge áýes, kúıge qumar. Otaǵasy ekeýmiz olardy óner salasyna bet burady dep otyrmyz. Úshinshimiz sportty jaqsy kóredi, jolymyzdy sol jalǵar, – deıdi anasy kúlimdep.
Almagúl Amankeldiqyzy – medısına salasyndaǵy 15 jylynda qanshama adamnyń ómirin aman alyp qaldy. О́jet dárigerdiń erik-jigerine qaıran qaldyq. Al bizder qara nardaı qadirli analardyń izin jalǵaǵandardy alystan izdep júrsek...
Qaraǵandy oblysy