О́lsheýli ómirdiń úkimindeı onkologııalyq aýrýlardyń atynyń ózi estigen jannyń úreıin týǵyzady. Al osy dertti denine jamaǵan jurttyń jaı-kúıin oılaý tipten aýyr. Talaı zamannan beri álemniń nebir bilgir dárigerleri tabandap, talap qylyp obyrdy jeńýdiń tyń, tıimdi tásilderin tabýǵa tyrysyp-aq keledi. Osy ǵalamdyq máseleni sheshýge atsalysqan otandyq ǵalymdar eńbeginiń nátıjesi taıaýda belgili boldy.
Osynaý aqjoltaı jańalyqty Ǵylym jáne joǵary bilim mınıstri Saıasat Nurbek jetkizdi. Onyń aıtýynsha, obyrǵa qarsy jańa dárini otandasymyz, ǵalym Dos Sarbasov jasap shyǵardy. Ol búginde Nazarbaev ýnıversıtetinde eńbek etedi.
«Bıotehnolog Dos Sarbasov Tehas onkologııalyq ýnıversıtetiniń Anderson zerthanasynda uzaq ýaqyt jumys istedi. Ol jasýshalyq tamaqtanýǵa mamandanǵan. Otandasymyz qaterli isik jasýshalarynyń qorektik úderisin buzýdyń jolyn taba aldy. Bul – onkologııalyq aýrýlarmen kúresýdiń ınnovasııalyq tásili», dedi S.Nurbek.
Mınıstrdiń aıtýynsha, ınnovasııalyq dárini aldymen qoıandar men tyshqandarǵa synaǵan. Sosyn onkologııa ýnıversıtetinde qaterli isikpen aýyratyn 15 adamǵa osy preparatty qoldanyp, synaqtyń birinshi kezeńi ótti. Bári oıdaǵydaı bolsa, kelesi jyly jańa dárini naryqqa shyǵarý josparlanyp otyr eken.
«D-VS qaterli isikke qarsy otandyq preparat ázirleý» jobasy boıynsha jasalyp jatqan bul dáriniń álemde balamasy joq. Jańa preparat obyrdyń aýyr túrlerine dýshar bolǵan naýqastardyń ómirin uzartatyn tıimdi em bolady degen senim mol.