Qarqaraly qalasynda 36 otbasy jańa páterli bolyp, qýanyshqa bólendi. Barlyǵy da baspanaǵa muqtaj jandar retinde kezekte turǵan. Bul páterler muqtaj adamdarǵa kommýnaldyq turǵyn úı qorynan jalǵa berilip otyr.
Qarqaraly aýdanyna jumys saparymen barǵan oblys ákiminiń orynbasary Erlan Qusaıyn men aýdan ákimi Ádiljan Arǵynov páter kiltterin saltanatty tapsyrý sharasyna qatysyp, baspanaly bolǵan otbasylarǵa aq tilegin jaýdyrdy.
Sóıtip, 18 páterli eki jap-jańa úıge qonystanǵan 36 otbasy kórshi-qolań bolyp shyǵa keldi.
Áleýmettik sanattary boıynsha aıta ótsek, páter alǵandardyń segizi – ata-anasynyń qamqorlyǵynsyz qalǵan balalar, taǵy bir segizi – kópbalaly otbasylar jáne jıyrma adam – áleýmettik osal topqa jatatyn jandar.
Byltyr da Qarqaralyda 10 otbasy baspanamen qamtamasyz etilgen edi. Olardyń ekeýiniń burynǵy baspanasy apatty jaǵdaıda dep tanylǵan, úsheýi kópbalaly ana, ekeýi ata-anasynyń qamqorlyǵynsyz qalǵan otbasy, taǵy da ekeýi tolyq emes otbasy jáne bireýi zeınetker kisi. Aldaǵy ýaqytta da osyndaı baspanalar óńirdegi muqtaj jandarǵa kezekpen, aýdandyq turǵyn úı komıssııasynyń qadaǵalaýymen berile beredi.
Qaraǵandy oblysy,
Qarqaraly aýdany