Jahandyq jolaıryqtaǵy ortalyq

Memleket basshysy Qasym-Jomart Toqaev «Ádiletti Qa­zaq­stannyń ekonomıkalyq baǵ­dary» atty Joldaýynda «Kólik­tik-logıstıkalyq áleýet­ti to­lyqqandy iske asyrý stra­tegııa­lyq mańyzǵa ıe. Qazaqstan sol­tústik pen ońtústikti, batys pen shyǵysty baılanystyra­tyn jahandyq jolaıryqta or­na­­lasqan. Bul bizdiń elimizge zor múmkindik berip otyr. Son­dyqtan kólik-logıstıka salasy ekonomıkamyzdy alǵa bastaı­tyn basty kúshtiń birine aınalýǵa tıis», dep atap ótken edi. Budan biz oblysymyzdaǵy «Dos­tyq-Moıynty» baǵytynda iri temirjol jobalaryn júzege asyryp, Dostyq shekaralyq temir­jol beketinde «qurǵaq» port salýdyń ózektiligi joǵary ekenin ańǵaramyz. Bul tek Jetisýdyń ǵana emes, elimizdiń ekonomıkalyq belsendiligin kórsetedi.

Mine, osy maqsat sheńberinde Alakól aýdanyna qarasty Dostyq aýylynda «Nurzholy Customs Service» halyqaralyq kólik-lo­gıstıkalyq ortalyǵy ashyldy. Bul – Qazaqstan men Qytaı Halyq Respýblıkasynyń eń alǵashqy shekaralarynyń biri. Jobanyń kózdegen múddesi qoıma sharýashylyǵy, halyqaralyq jáne jergilikti logıstıka salasynda el naryǵynda sapaly jáne básekege qabiletti qyzmetterdi ilgeriletý. Muny atalǵan nysan­nyń ashylý rásimine arnaıy kelgen Kólik vıse-mınıstri Maqsat Qalıaqparov ta aıtty.

«Elimizdiń kólik-logıs­tıka­lyq áleýetin arttyrýǵa Mem­leket basshysy erekshe kóńil bólýde. «Dostyq-Moıynty» baǵytynda temirjol qurylysyn sapaly aıaqtaý – búgingi kúnniń basty taqyryby. Joba júzege asqanda Qazaqstan men Qytaı arasyndaǵy taýar tasymaly eki jarym esege artatyn bolady. Halyqaralyq kólik-logıstıkalyq ortalyqtyń elimizdiń ekonomıkalyq damýyna

tıgizer paıdasy ushan-teńiz. Bolashaqta Ortalyq Azııa men Eýropa arasyndaǵy taýar­lyq alys-beristi birneshe esege arttyramyz degen jospary­myz bar. Qazirgi tańda jańadan ashylǵan ámbebap keshen Qytaı men Qazaq­stan arasyndaǵy saýda-sattyqtyń jumysyn jandandyrady. Eń bas­tysy, árbir istiń berekesin halyq kórýge tıis. Qazaqstannyń álemdik ekonomıkadaǵy básekege qabilettiligin arttyrýǵa yqpal ete otyryp, óńirlik jáne halyq­aralyq kólik qatynasynda mańyz­dy ról atqarady dep senemiz», dedi M.Qalıaqparov.

Onyń aıtýynsha, aýqymdy jobaǵa 2,8 mlrd teńge ınves­tısııa tartylyp, 120 adam tu­raqty jumyspen qamtamasyz etilgen. Odan keıin Memlekettik kirister komıtetiniń tóraǵasy Jandos Dúısembıev jobanyń jaqsy júzege asqanyn aıtyp, halyq­aralyq kólik-logıstıkalyq ortalyqtyń jumysyna sáttilik tiledi.

Halyqaralyq kólik logıs­tıkalyq ortalyǵynyń bir erek­sheligi – jetkizý tizbegin je­ńildetý jáne tutynýshynyń logıs­tıkalyq shyǵyndaryn azaı­tý úshin qoıma jumysy kross-dokıng (avtokólikten avtokólikke artyq tıeý) tehnolo­gııasy ar­qy­ly júzege asady. Iаǵnı Qy­taı­dan kelgen júk otandyq av­tokólikterge jyldam tıeletin bolady. Jobany elimizdiń Qarjy mınıstrligi memlekettik kirister komıteti «Nurzholy customs service» JShS-men birlesip jú­zege asyryp otyr.

Keshenniń ýaqytsha saq­taý qoımasy aýmaǵynda kedendik rásimdeý ortalyǵyn uıymdastyrýmen jáne ornalas­tyrýmen iske asyrady. «Dostyq» keden beketinen ótetin júk kólik­teriniń sany táýligine 200-den 600-ge deıin  ulǵaıtylyp, táýliktik júk aınalymyn 4 myńnan 12 myń tonnaǵa deıin arttyrýǵa úlken múmkindik be­redi. Bul degenińiz – bir jyl ishinde júk aınalymyn 12 myń tonnadan 3 mln tonnaǵa deıin arttyrýǵa qaýqarly degen sóz.

Qoıma ishi zamanaýı talap­tarǵa sáıkes barlyq qajetti ári sapaly qural-jabdyqtarmen jabdyqtalǵan. Atap aıtsaq, kúzet, beınebaqylaý kameralary, órt sóndirý júıeleri jáne t.b ártúrli taýardy óńdeýge arnalǵan zamanaýı ınfraqurylymdarmen jabdyqtary bar.

Shynynda, jer betindegi halyqtyń tutynýshylyq sura­nysy kóbeıip, óndiretin ónim kólemi eselep artqan saıyn sonshama júkti tasymaldaý máselesi de kún tártibinen túsken emes. Adam balasy myńdaǵan tonna taýardy bir núkteden ekinshi núk­tege jetkizý maqsatynda jańa tehnologııanyń sońǵy múm­kindikterin paıdalanýda. Hal­qy tyǵyz ornalasqan qalalar men eldi mekender mańaıynda jo­laıryqtarymen qosa iri qoımalar paıda bola bastady. Bul rette kólik tasymaly joldarynyń aýqymdy, keń salaly bolýy eldiń áleýmettik-ekonomıkalyq ál-aýqatyn jaqsartýǵa múmkindik bereri anyq.

Jetisý oblysy