«El ishi – óner kenishi» degen támsil qııan shettegi aýylda jatsa da, neshe túrli tehnıka oılap taýyp, onysyn úı sharýashylyǵynda kádege jaratyp otyrǵan Qaırat syndy azamatqa da qarata aıtylsa kerek. Buǵan deıin qustyń júnin julatyn arnaıy apparat, beton qospasyn aralastyrǵysh, tósemtas shyǵaratyn qurylǵy jasaǵan ónertapqysh taıaýda shaǵyn traktor qurastyryp shyǵardy.
«Qajet bólshekterdi izdep júrip ár jerden jınap aldym. «Jıgýlıdiń» beldemesin kesip, qysqartyp saldym, qozǵaltqyshy – motobloktiki. Qosalqy bólshekteri de ońaı tabylady. Keıbir bólshekterdi metall qabyldaıtyn jerden alýǵa týra keldi. Eski bolǵanymen, myqty temirler, arzanǵa shyqty. Bárin túgendep bolǵan soń, bolgar keskishin, kilt, dánekerlerý qurylǵysy kerek boldy. Osy úsh saımannyń kómegimen bir jyldyń ishinde bastan-aıaq qurastyryp shyqtym. Kóp qarajat ketken de joq. Azyn-aýlaq mal ustap otyrmyz. Onyń qystyq azyǵyn daıarlaý qıyndap barady. Bir tonna shóptiń baǵasy bıyl 35-40 myń teńgege jetti. Qazir osy traktorymnyń arqasynda shópti de shaýyp alamyn, eki-úsh ese arzanǵa túsedi», deıdi Qaırat Jumatuly.
Ámbebap traktordyń eni 90 sm, shap-shaǵyn bolǵanymen, boıynda jeti attyń kúshi bar. Osy aýyldaǵy talaı avtokólikti kúrtik qarǵa batyp qalǵan jerinen ońaı julyp alǵan. Qoranyń esigine de op-ońaı syıyp ketedi. Qı shyǵarýǵa, aýlanyń qýys-qýysyndaǵy qardy tazalaýǵa taptyrmaıtyn tehnıkanyń naq ózi. Bir saǵat jumys istese, nebári 1 jarym lıtr janarmaı ketedi. Artyna tirkeıtin shalǵy, soqa, tyrmaq, kartop otyrǵyzatyn, qazatyn, túpteıtin saımany, aldyna iletin aıyr, kúregi bar. О́nertapqysh kóktemgi qı shyǵarý, jer jyrtyp, kartop otyrǵyzý, jazǵy shóp shabý, ony tyrmalap, jınap, jetkizý, qysta qar kúreý sekildi sharýanyń bárin osy shaǵyn traktorymen-aq tyndyryp otyr.
Búginde aýyl áńgimesiniń eń basty taqyryby da Qaırattyń traktory tóńireginde órbıdi. Kórshileri kómek surap keledi. Kóztanys, beıtanys kisiler aýyldyń bir shetinen arnaıy kelip, traktordyń tynysyn, jumysyn tekserip kórip, bas shaıqap ketedi. Satyp alǵysy keletinder de kóp. Tipti Qaırekeńdi aýdan ákimi arnaıy shaqyryp alyp, ortalyq kóshelerdiń muzyn qyrǵyzyp kórgen soń: «Trotýarlardyń qaryn arshyp, muzyn qyryp turýǵa tenderge qatysyp kórseńiz qaıtedi?» degen usynys aıtypty. Alaıda ýaqyt tapshy bolǵan soń, ónertapqysh ákimniń bul usynysynan bas tartyp otyr. О́ıtkeni aýdandyq jumyspen qamtý jáne áleýmettik baǵdarlamalar bóliminiń kóligin júrgizedi. Bul da jaýapty jumys, kúnuzaq bólimniń sharýasymen anda-munda shaýyp júredi.
«Oqýshy kezimizde mektepte «Kóliktaný negizderi» degen sabaq júrdi. Sol pándi jaqsy kóretinmin. Aǵaıymyz ár túrli tehnıkanyń qalaı qurastyrylatynyn úıretetin. Keıin áskerden kelgen soń, aýylǵa oralyp traktor tizgindedim. Bestaýda mehanızator bolyp eńbek ettim. 1999 jyly Qamystyǵa kóship keldik. Al endi meniń ónertapqyshtyǵyma kelsek, munyń bári aýyl turmysyndaǵy qajettilikten týyp jatyr», deıdi temirdi taldaı ıip, traktor jasap shyǵarǵan sheber.
Qostanaı oblysy,
Qamysty aýdany