Byltyr Memleket basshysynyń Jarlyǵymen mádenıet salasyndaǵy Memlekettik stıpendııa ádebıet pen ónerdiń 75 qaıratkerine taǵaıyndaldy. Almatyda «Dostyq úıinde» ótken saltanatty is-sharada Mádenıet jáne aqparat mınıstri Aıda Balaeva stıpendııa ıegerlerin marapattady.
Jyl saıyn taǵaıyndalatyn Memlekettik stıpendııa mádenıet pen óner, shyǵarmashylyq salasynyń ókilderi jáne daryndy jastardy qoldaýǵa baǵyttalǵany belgili. Mınıstr marapattaý is-sharasyn jas qalamgerlerge memlekettik qoldaý kórsetý, daryndy aqyn-jazýshylardyń jańa býynyn qalyptastyrý maqsatynda tuńǵysh ret berilgen Prezıdenttik arnaýly ádebı syılyqty tapsyrý rásimimen bastady.
«Ádebıet pen óner salasy ókilderine Memlekettik syılyq berý elimizde dástúrli is-sharaǵa aınaldy. Ár salanyń talantty ókilderine qoldaý bildirý qoǵamnyń alǵa basýyna, salaǵa kelgen jastarǵa serpin berýge yqpal etedi. Bul – jazýshynyń da, óner adamynyń da jankeshti eńbegine jasalǵan qurmet pen qoldaý. Elimizdiń qaı óńirinde de bolmasyn qoǵamnyń damýyna atsalysyp júrgen ár azamattyń eńbegi baǵalanýy qajet. Bul jolǵy marapat osy údeden shyqty degen senimdemin. Búginde elimizde qaı salany alsaq ta túıtkildi másele joq dep aıta almaımyz. Qazirgi kezde tıisti mınıstrlik óńirler boıynsha arnaıy saraptama júrgizip, naqty máselelerdi anyqtaý baǵytynda jumystardy jalǵastyryp keledi. Degenmen kitaphana isi, kitap shyǵarý, bilim berý salasyn jaqsartýǵa baǵyttalǵan barlyq is-sharany nátıjeli etý asa mańyzdy. Al ádebıet pen ónerge jańa qadam basyp, óz eńbekterimen elengen jastarǵa degen senim zor. О́tken jyldan bastap «Halyq jazýshysy» mártebesi qaıta jandandy. Bul mártebe jas qalamgerler úshin bıik shyń ispetti deıtin bolsaq, jastardyń osy bıik shyńǵa kóterilýine tilektestik bildiremin», dedi mınıstr.
Jıyn barysynda mınıstr qazaq ádebıetiniń kórnekti ókilderi Dýlat Isabekov, Beksultan Nurjeke, Kádirbek Segizbaev, Iranbek Orazbaev, Marfýǵa Aıtqoja, Hanbıbi Esenqaraqyzy, Bahytjan Qanapııanov, Nurǵalı Oraz, Baýyrjan Jaqyp, óner salasynyń qaıratkerleri Asanáli Áshimov, Nurǵalı Núsipjan, Tuńǵyshbaı Jamanqulov, Núketaı Myshbaeva, Esmuqan Obaev, Amandos Aqanaev jáne basqalarǵa Memlekettik stıpendııany tabys etti. Sonymen qatar jeńimpaz jastar qatarynda Kann halyqaralyq festıvaliniń júldegeri, aktrısa Samal Eslámova, kameralyq ansambl ártisi Tolqynhan Samǵar, skrıpkashy Erkebulan Saparbaev, sýretshi Renat Elýbaev, Abaı atyndaǵy qazaq ulttyq opera jáne balet teatrynyń solısi Andreı Tregýbenko, «Astana opera» memlekettik opera jáne balet teatrynyń solısi Nazym Saǵyntaı, M.Gorkıı atyndaǵy memlekettik akademııalyq orys drama teatrynyń akteri Maksım Iаshenko marapattaldy.
Prezıdenttik arnaýly ádebı syılyqqa úmitker 18-35 jas aralyǵyndaǵy qalamgerlerge arnalǵan baıqaý «Proza», «Poezııa», «Dramatýrgııa» jáne «Balalar ádebıeti» atalymdary boıynsha ótkeni belgili. Baıqaýǵa qatysqan 50-den astam qatysýshynyń ishinen 17 talapker – «Balalar ádebıeti», 9 qatysýshy – «Dramatýrgııa», 13 qatysýshy – «Poezııa», 14 qatysýshy «Proza» atalymy boıynsha ótinim bergen.
Osy báıgeden oza shapqan jeńimpazdar qatarynda komıssııanyń sheshimimen «Proza» atalymy boıynsha «Kvant» týyndysy úshin Doshan Jylqybaı, «Poezııa» atalymynda «Qalalyq qustar» óleńder toptamasy úshin Edilbek Dúısenov, «Balalar ádebıeti» atalymy boıynsha «Atyń ozsyn, azamat!» toptamasy úshin Oljas Qasym, «Dramatýrgııa» atalymy boıynsha «Taý kótergen Tolaǵaı» dramalyq týyndysy úshin Aıtolqyn Áshimova Prezıdenttik syılyqtyń ıegeri atandy.
Osy oraıda memlekettiń ádebıet jáne óner salasynda júrgen jastarǵa qoldaý bildirip jatqanyn zor qýanyshpen qabyldap, olarǵa jyly lebizin bildirgen Qazaqstannyń halyq jazýshysy Beksultan Nujeke ásirese balalar ádebıetine kórsetilgen qoldaýdyń mańyzdylyǵyna toqtalyp, Prezıdenttik arnaýly ádebı syılyqqa derekti shyǵarmalar atalymyn qosý qajet degen usynysyn bildirdi. Al aqyn, Memlekettik «Daryn» jastar syılyǵynyń laýreaty Erlan Júnis jas qalamgerlerdi quttyqtap, olardyń boıyndaǵy jastyq jiger, synshyldyq, otansúıgishtik qasıetter ulttyq ádebıetimizdiń kemeldenýine jumsalsa dep tilek aıtty.
ALMATY