Taldyqorǵandaǵy Kórkemóner galereıasynda «Jetisu book fair» kitap jármeńkesi bastaldy. Onda «Ziyat», «Atamura», «Asyl qazyna» sııaqty kitap dúkenderi men jergilikti aqyn-jazýshylar eńbekterin satylymǵa shyǵardy. Sondaı-aq jıyn aıasynda jazýshy Qanat Tileýhannyń «Shatyrdaǵy áıel» kitabynyń tusaýkeser rásimi ótti.
Atalǵan jármeńkede álem jáne qazaq ádebıeti klassıkteriniń shyǵarmalary, balalarǵa arnalǵan ertegiler men ensıklopedııalar, pýblısıstıkalyq, motıvasııalyq eńbekter de bar. Mádenı is-sharanyń ashylý saltanatyna qatysqan oblys ákiminiń orynbasary Marlen Kólbaev kitaptyń mán-mańyzyna toqtaldy.
«Urpaq tárbıesinde, qoǵamnyń damýynda kitaptyń róli zor. Sondyqtan kitap oqý mádenıetin qalyptastyrý men nasıhattaý, qazaq ádebıetin damytýǵa qoldaý jasaý – bizdiń ortaq mindetimiz. Adam ómirde óz ornyn tapqysy kelse, qandaı da bir jetistikke jetemin dese, eń aldymen kitap oqýy kerek. Búgingi jármeńkeni jazǵy mezgildi kútpeı, jyldyń basynan bastap ketti. Endi bul kitaptardy basqa aýdan-qalalarǵa da jetkizetin bolamyz», dedi M.Kólbaev.
Is-sharaǵa arnaıy kelgen Mádenıet jáne aqparat mınıstriniń keńesshisi Serik Sarybaı óz sózinde Jetisý kitaphanasy serııasymen jaryq kórgen kitaptardyń birneshe danasyn Ulttyq Akademııalyq kitaphananyń qoryna tapsyryp, kitaptardyń PDF formattaǵy nusqasyn kazneb.kz saıtyna berý kerektigi týraly usynysyn jetkizdi. Al Jazýshylar odaǵy tóraǵasynyń orynbasary Beıbit Sarybaı sıfrlyq tehnologııanyń qanshalyqty qarqyndy damyǵanyna qaramastan, kitap adamzattyń eń basty serigi bolyp qala beretinin aıtty.
«О́tken jyly 13 kitaptyń tusaýyn kestik. Bul kitaptar da búgin osy jármeńkede oqyrmanǵa usynylyp otyr. Bıylǵy jyly da bul ıgi is jalǵasady. Bul rette Jetisý tarıhyna jáne ólketanýǵa qatysty kitaptar shyǵarýǵa basymdyq bergeli otyrmyz», deıdi oblystyq mádenıet, arhıvter jáne qujattama basqarmasynyń basshysy Qýanysh Súleımenov.
Kitap jármeńkesinde óz týyndylaryn satylymǵa usynǵan jergilikti aqyn-jazýshylar, jýrnalıster men sýretshiler arasynda atap aıtqanda Núsipbaı Ábdirahym, Ámire Árin, Jaqan Barımbekov, Saǵynysh Namazshamova, Gúlbaqyt Qasen, Jangeldi Nemerebaı, Samat Slıamǵazın, Qajet Andas, Azamat Nurmuhan bar.
Kitap jármeńkesin oblystyq mádenıet, arhıvter jáne qujattama basqarmasynyń qoldaýymen S.Seıfýllın atyndaǵy kitaphana ótkizip jatyr. Jármeńke 29 qańtarǵa deıin jalǵasady. Is-shara aıasynda «Muzycal party» klascıkalyq mýzyka keshi, «San suraqqa saıahat» vıktorınalyq oıyndar jáne «Bıblıo sport» alańynda toǵyzqumalaq jáne shahmat oıyndary uıymdastyrylady.