«Amanat» partııasynyń Katonqaraǵaı aýdandyq fılıaly jáne aýdandyq ortalyq kitaphana ujymynyń uıymdastyrýymen Úlken Naryndaǵy aýdandyq Mádenıet úıinde Memlekettik syılyqtyń laýreaty Álibek Asqarovtyń shyǵarmashylyǵyna arnalǵan «Álibek – álem nemese sýretshilikten sýretkerlikke» atty kórkemsóz oqý sheberleriniń baıqaýy ótti.
Jazýshy qalamynan týǵan «Taıga tolǵaýy», «О́r Altaı, men qaıteıin bıigińdi», «Munar taýdy, muzart shyńdy ańsaımyn», «Erte túsken bozyqraý», «Qutmeken», taǵy da basqa kóptegen týyndy qazaq ádebıetinde ózindik ornymen aıshyqtalyp, oqyrman qaýym tarapynan baıaǵyda-aq laıyqty baǵasyn alǵan.
Jıhankez jazýshy Altaıdyń arda tabıǵatymen ǵana tildesken joq, sonaý Afrıka, Iаkýtııa elderine barǵan saparlary týraly safarı janryndaǵy jaýhar týyndylar da oqyrman qaýymnyń tanymyn keńeıtken.
Búgingi ádebı sharaǵa Úlken Naryn, Solonovka, Kókbastaý, Balǵyn men Kókterek aýyldarynyń ónerpazdary qatysyp, baqtaryn synady. Jınalǵan jurt áýeli Álibek Asqarovtyń shyǵarmashylyǵynan syr shertetin shaǵyn kórmeni tamashalady.
Jıynda sóz alǵan Katonqaraǵaı aýdany ákiminiń orynbasary Radjan Ilııasov ádebıetsúıer qaýymdy quttyqtap, saıysqa túskeli turǵan sheberlerge sáttilik tiledi. Sondaı-aq belgili aqyn, Qazaqstan Jazýshylar odaǵynyń Astana qalalyq fılıalynyń tóraǵasy Dáýletkereı Kápulynyń joldaǵan quttyqtaý hatyn oqydy.
Baıqaý ssenarıı boıynsha úsh bólimnen turdy. «Altaı jyrshysy» dep atalǵan birinshi bólimde qatysýshylar Álibek Asqarovtyń safarı janryndaǵy týyndylarynan úzindilerin jatqa oqyp, saıysty. Bul kezeńde Kókbastaý, Úlken Naryn, Solonovka aýyldary ónerpazdarynyń óneri kórermenniń kóńilinen shyqty. Ásirese Úlken Naryn aýyldyq lıseıiniń ustazy Aıgerim Saǵıtqanqyzynyń baıqaýǵa daıyndyǵy, sahnadaǵy óneri kópshilikti tánti etti. Ol «Ajal taýy» shyǵarmasynan ázirlegen kólemdi úzindisin bir múdirmeı mánerlep jatqa oqyǵanda, qalyń kópshilik shytyrman shyǵarma ishine enip ketkendeı boldy.
Ekinshi kezeń «О́r Altaı, men qaıteıin bıigińdi» dep ataldy. Munda saıyskerler jazýshynyń oqyrman jyly qabyldaǵan san taǵdyrly aýyl keıipkerleriniń obrazyna endi. Ásirese Q.Damıtov atyndaǵy orta mektebi ustazdarynyń ónerlerine uzaq qol soqty. Sahnalyq mádenıet, ártistik qabilet, keıipkerler obrazyn ashý, sahnalyq dekorasııa, bári de ózderine jarasymdy bolyp turdy.
«Áıel parasaty» dep atalatyn baıqaýdyń sońǵy kezeńinde qatysýshylary sahnalyq kórinis arqyly jazýshy shyǵarmalaryndaǵy qazaq áıeliniń ómiri men san qıly taǵdyryn, asyl qasıetterin kórermenge jetkizýge tyrysty. Bul bólimde ár qatysýshy úlken jaýapkershilikpen daıyndalǵandaryn kórsetti.
Qazylar alqasynyń tóraıymy Janar Sydyqova baıqaýdyń uıymdastyrýshylary men barlyq qatysýshylaryna alǵysyn aıtyp, is-sharanyń joǵary deńgeıde ótkendigin, saıyskerlerdiń kórermenge ádemi óner keshin tartý etkendigin atap ótti. Baıqaý qorytyndysy boıynsha Álibek Asqarov oqýlarynda júldeli úshinshi oryndy Úlken Naryn aýyldyq lıseıi ıelense, ekinshi oryn Katonqaraǵaı agrarlyq-tehnıkalyq kolledjine buıyrdy. Birinshi oryndy Kókbastaý men Solonovka aýyldarynyń ónerpazdary enshiledi. Al bas júldege qazylar alqasy biraýyzdan Q.Damıtov atyndaǵy orta mekteptiń oqýshylary laıyq dep tanyldy. Baıqaýda jeńimpaz atanyp, júldege ıe bolǵan ónerpazdar dıplom jáne estelik syılyqtarmen marapattaldy.
Úlken Naryn aýdandyq máslıhaty tóraǵasy Janar Sydyqovanyń tóraıymdylyq etken qazylar alqasynyń quramynda Katonqaraǵaı aýdandyq Jastar resrýstyq ortalyǵynyń dırektory Aıaýlym Qabdýálıeva, Tilder ortalyǵynyń dırektory Álem Súleımenova, kitaphana ardageri Kúlbaǵıla Qurmanova men aýdandyq Dostyq úıiniń ádiskeri Anar Manııarova boldy.
Aıta keteıik, Álibek oqýlary Katonqaraǵaı aýdanynyń basqa da aýyldarynda uıymdastyrylyp, kórkemsóz oqýdyń sheberleri anyqtalyp jatty.
Shyǵys Qazaqstan oblysy,
Katonqaraǵaı aýdany