Qarýly kúshterdiń, basqa da áskerler men áskerı qurylymdardyń qyzmetshileri úshin biryńǵaı kıim nysany engizilmek. Ony ótken jyly 5 mamyrda ótken Búkilarmııalyq keńeste Memleket basshysy Qasym-Jomart Toqaev maquldaǵan bolatyn.
Qoldanystaǵy kıim nysandary Memleket basshysynyń tapsyrmasy boıynsha múddeli memlekettik organdarmen birlesip qaıta óńdeldi. О́tken jylǵy 12 jeltoqsanda Prezıdenttiń 2011 jylǵy 25 tamyzdaǵy «Qazaqstan Respýblıkasy Qarýly kúshteriniń, basqa da áskerleri men áskerı qurylymdarynyń áskerı qyzmetshileriniń áskerı kıim nysany men aıyrym belgileri týraly» Jarlyǵyna ózgerister engizildi.
Áskerı qyzmetshiler qarakól jaǵaly qysqy kúrteniń ornyna «Alıaska» tıpti kúrteler kıedi. Joǵary ofıserlik quramnan ózge áskerı qyzmetshilerdiń bas kıimderi kúnqaǵarsyz bolady. Maýsymdyq kúndelikti plash kamýflıaj tústi dalalyq kúrteshege, al kúndelikti svıter dalalyq svıterge aýystyryldy. Áskerı qyzmetshi áıelder úshin pılotkanyń ornyna kepı qarastyrylǵan.
Joǵary ofıserlik quramnan, Qorǵanys mınıstrligi men Bas shtabtyń qurylymdyq bólimsheleriniń, Qarýly kúshter Bas basqarmalarynyń bastyqtarynan, bas qolbasshylardan, qolbasshylardan jáne olardyń orynbasarlarynan ózge áskerı qyzmetshilerdiń barlyq sanaty úshin kıtel, shalbar, jeıdeler, galstýktar alynyp tastaldy.
Keńselik kıim nysany tek basqarý organdary, joǵary oqý oryndarynyń turaqty quramy, áskerı bólim komandırleri, olardyń orynbasarlary jáne áskerı qatynastar komendatýralary úshin kúndelikti kıim úlgisi bolyp aıqyndalady. Qara tústi qonyshy uzyn báteńkemen qatar turaqty quramǵa arnalǵan qum tústi jazǵy báteńkemen qamtamasyz etý de qarastyrylǵan. Bul nusqa elimizdiń geografııalyq erekshelikterine, sondaı-aq ystyq ótkizbeıtin jáne búrkemeleý qasıetterine baılanysty.
Jańa úlgidegi dalalyq kıim-keshekke kóshý 2024 jyldyń tórtinshi toqsanyna, qalǵan kıimderge kóshýdi úsh jyl ishinde júzege asyrý josparlanǵan.