Búginde 3,5 myńǵa jýyq turǵyn mekendegen Samsy aýylyna tabıǵı gaz kelip, halyq qýanyp jatyr. Saryaıazǵa qaramastan saltanatty is-sharaǵa aýyldyń aqsamaıly qarııalary da kóptep jıylǵan eken. Báriniń júzinen qýanysh lebi bilinedi.
«Prezıdent Qasym-Jomart Toqaev Joldaýlarynda birinshi kezekte halyqtyń turmys-tirshiligin jaqsartýdy tapsyryp keledi. Aldyńǵy kezekte aýyzsýmen, elektr energııasymen qamtamasyz etý, jol jasaý, sondaı-aq tabıǵı gazǵa qosý mindetterin júzege asyrý boıynsha óńir basshysynyń naqty tapsyrmalary bar. Búgingi is-shara – sonyń jarqyn kórinisi. Aýdanymyzda 61 eldi meken bar. Sonyń ishinde Samsy men Tarǵap aýylynyń turǵyndary búgin kógildir otynǵa qosylady. Bul baǵyttarǵa bólinip jatqan qarajat ta qomaqty. Sebebi ótken jyldyń ózinde gazdandyrý baǵytynda 3,5 mlrd teńge qarjy qarastyrylsa, osy jyldyń basynda eldi mekenderdi kógildir otynmen qamtamasyz etý úshin qosymsha 1,5 mlrd teńge qarjy qarastyryldy. Bizdiń aýdanymyzda buǵan deıin 28 eldi meken, ıaǵnı 46 paıyzy kógildir otynmen qamtylǵan bolsa, 2025 jylǵa deıin bul kórsetkishti 65 paıyzǵa jetkizýdi kózdep otyrmyz. Bul úshin tolyq jobalyq-smetalyq qujattarymyz ázirlenip jatyr», dedi Jambyl aýdanynyń ákimi Nurlan Ertas.
Ol tabıǵı gazdyń kelýi aýyldarda bıznestiń keńeıýine, kásippen aınalysatyndardyń kóbeıýine oń áser etetinin aıryqsha atady.
«Bıýdjet esebinen berilip jatqan kógildir otynnyń ereksheligi – eń aldymen halyqqa qoljetimdiliginde. Mysalǵa aıtsaq, aýdan ortalyǵynda jeke ınvestorlar salǵan gazǵa qosylýdyń baǵasy 350-380 myń teńgeden bolsa, Samsy aýylynyń turǵyndary 200-220 myń teńgeniń tóńireginde tóleıdi. Osy baǵany ustap qalý – birinshi kezektegi maqsatymyz», degen aýdan ákimi jıylǵan jurtty qýanyshymen quttyqtady.
Jıyn barysynda aýyl aqsaqaldary aǵynan jaryldy. Olar Samsyǵa kógildir gazdyń kelýine yqpal etip, tabanyn tozdyrǵan belsendi azamattardyń atyna alǵys bildirip, aýylǵa jaǵdaı jasalsa, jastar qalaǵa ketpeı, týǵan jerin túletetinin aıtty.
«Kógildir otynnyń kelýin kópten kúttik. Osynyń arqasynda kómirge ketken shyǵyndarymyz azaıady. Endi aýyldyń kósheleri jaryqtanyp, asfalttalsa, Mádenıet úıi salynsa, turmysymyz budan da jaqsara túsedi», dedi aýyldyq aqsaqaldar keńesiniń tóraǵasy Muhtar Naımanhanuly.
Sóıtip, Samsy aýylyna kelgen kógildir gazdyń alaýy saltanatty túrde tutatylyp, zerli kımeshek kıgen ájeler shashýyn shashyp, al atalar aq batasyn berip, arqa-jarqa boldy.
«Úıimizde jasy 80-nen asqan tyl ardageri atamyz ben apamyz bar. Qarashańyraqtyń kelinimin, tórt balamyz ósip keledi. О́zim «Maıbulaq» sý júıesinde eńbek etemin. Erteli-kesh ot jaǵý ońaıǵa soqpaıdy. Úlken kisiler men bala-shaǵa jaýrap qalmasyn dep alańdaıtynbyz. Gazǵa qosylǵaly jumysymyz jeńildep, ýaqytymyz únemdelip, raqattanyp qaldyq», deıdi qýanyshyn jasyra almaǵan Dına Nurǵalymova.
Almaty oblysynda 384 eldi mekenniń 294-i gazdandyrýǵa jatady. Qazirgi ýaqytta 149 eldi meken, ıaǵnı 51 paıyzy gazdandyrylyp, barlyǵy 1,1 mln adam kógildir otynǵa qol jetkizdi.
«Shańyraqtaryńyzǵa kógildir otynmen birge qut-bereke kelsin. Búgin Tarǵap pen Samsy eldi mekeni qosylsa, keler apta Úlgili aýyly da osyndaı qýanyshqa keneledi. 2023 jyly gazdandyrýǵa oblystyq bıýdjetten 3,6 mlrd teńge qarastyrylǵan. Sonyń negizinde Aqterek, B.Qydyrbekuly, Jaısan, Aqseńgir, Kókdala jáne Qazybek bek, Degeres, Beriktas aýyldaryna tabıǵı gaz qubyryn júrgizý jumystary bastaldy. Eldi mekenderdi gazdandyrý jumystary óńirimizdiń Ile, Balqash, Talǵar, Uıǵyr aýdandarynda da jalǵasyp jatyr. Byltyr Baqanas aýylynyń 7 myń turǵyny tabıǵı gazǵa qol jetkizdi. Sondaı-aq Qonaev qalasyn damytýdyń 2024-2025 jyldarǵa arnalǵan keshendi josparyna sáıkes, «Jańa-Ile», «Qonaev-2» AGTS qurylysy boıynsha konkýrstyq rásimderdi ótkizýge jáne №10, №9, №20, Arna, Spýtnık, Raýan shaǵyn aýdandaryna ınjenerlik ınfraqurylymyna magıstraldyq gaz qubyryn salýǵa tehnıkalyq qujattama daıyndalyp jatyr. Onyń smetalyq quny 3 077,203 mln teńgeni quraıdy. Munyń barlyǵy aýyl turǵyndarynyń turmysyn jeńildete túsedi», dedi oblystyq turǵyn úı-kommýnaldyq sharýashylyq basqarmasynyń basshysy Ashat Berdihanov.
Almaty oblysy