Qanat baılaǵan qamqorlyq

Ashylǵannan bastap birneshe aı ýaqyt ishinde ortalyqta 400-ge jýyq bala em alyp shyqty. Onyń ishinde 52 bala emin-erkin júre bastasa, 29-y sóıleı bastaǵan. Ortalyqta tájirıbeli nevropatologter, ońaltý dárigerleri, jattyǵý terapııasynyń nusqaýshylary, psıhologter, logopedter men reabılıtolog mamandar jumys isteıdi. Serebraldy sal aýrýy, aýtızm jáne damýdyń kesheýildeýi bar balalar reabılıtasııa men ońaltýdan ótedi. Búginde ortalyq aıyna – 50, jylyna 600 balany qabyldaıdy. Aýrýhana dı­rektorynyń medısınalyq bó­lim boıynsha orynbasary Nına Der­kachtyń aýrýhananyń jańa ǵımaratqa kóshýi ońaltý ortalyǵynyń ashylýyna múmkindik bergenin aıtady.

– Jańa ǵımaratqa kóshkenge deıin bizde ońaltý ortalyǵy bolǵan joq. Osy jerde osyndaı mańyzdy qyz­metti iske qostyq. Erte aralasý or­talyǵynda 3 aıdan 3 jasqa deıin­gi balalar kómek alady. Ońaltý orta­lyǵyna 18 jasqa deıingi bala­lar qabyldanady. Tuz shahtasy, shýngıt bólmesi, sensorlyq bólme, toly­ǵymen jabdyqtalǵan emdik-dene shynyqtyrý kabınetteri jumys istep tur. Kishkentaılar úshin «Po­seı­don» ımmersııalyq vannasy bar. Qazirdiń ózinde nátıjeler jaman emes. Ata-analar da rıza bolyp qaıtady, – deıdi Nına Grıgorevna.

Munda turaqty túrde ońaltý kýrsyn alatyndar keledi. Em-domyn tolyq qabyldap alǵan soń, araǵa birneshe aı salyp, joldamamen qaıta kele alady. Alys aýdandardan kelgender táýliktik stasıonarda bolsa, qala basynan kelgender kúndiz kelip turady. Biregeı ortalyq osyndaı múmkindikti oılastyryp qoıǵan.

Erekshe balanyń anasy Symbat Bekmaǵambetova osymen ekinshi ret kelip, ońaltý kýrsynan ótip jatyr.

– Buǵan deıin basqa jerlerde boldyq. Biraq mundaǵy mamandardyń balaǵa degen qarym-qatynasy erekshe. Balaǵa jany ashyp turady. So­dan da bolar, nátıje de bar, – deıdi ol.

Artem esimdi balanyń anasy Anıa da ortalyqqa ekinshi ret kelip, em-dom sharalaryn qabyldap jatyr.

– Biz osymen ekinshi ret keldik. Molodejnyı kentinenbiz. Osynda kelgeli balam ózdiginen tura alatyn boldy. Birneshe sekýnd bolsa da, bul – biz úshin úlken jetistik. Bir jasynda reanımasııaǵa túsip, damý úderisi tejelgen edi. Qazir bárin qaıtadan úırenip jatyrmyz, – deıdi Anıa.

Bastysy, biregeı ortalyqta AQSh, Germanııa, Ulybrıtanııa, Reseı jáne Qazaqstan óndirgen eń zamanaýı medısınalyq ońaltý jáne dıagnostıkalyq jabdyqtar bar. Muny «Samuryq-Qazyna» jáne «Qazaqstan halqyna» qorlary jetkizgen. О́tken aptada sol qordyń ókilderi ortalyqtyń jumysymen tanysqan edi. Bizdiń óńirdegi ortalyq qor atsalysqan 35-nysan eken.

– «Samuryq-Qazyna» qory 2020 jyldan beri erekshe balalardy ońaltýdan ótkizetin ortalyqtarǵa qarjylaı qoldaý kórsetip keledi. Úsh jyl ishinde biz Qazaqstanda ın­k­lıýzıvti qoǵamdy damytýǵa baǵyt­talǵan 15 ońaltý, 14 erte aralasý jáne aýtızmi bar balalarǵa arnalǵan 5 ortalyqtyń tusaýyn kestik. Osy jyldar ishinde 40 myńǵa jýyq bala ońaltýdan ótti, – deıdi «Samruk-Kazyna Trust» qorynyń basshysy Alfııa Adıeva.

Aldaǵy ýaqytta Qaraǵandy oblysynda taǵy bir ońaltý ortalyǵy, 4 aýylda angarlyq tıptegi sport keshenin ashý jospary bar eken. Mundaı ıgilikti habarmen «Qazaqstan halqyna» qaıyrymdylyq qorynyń basqarma tóraǵasynyń orynbasary Lázzat Shyńǵysbaeva bólisti.

– Prezıdent ońaltý qyzmeti qol­jetimdi bolýyn tapsyrdy. Eki jyl­dyń ishinde «Qazaqstan halqyna» qaıyrymdylyq qory Qaraǵandy obly­synda jalpy somasy 11 mlrd teńge bolatyn 23 jobany júzege asyrdy, – dedi ol.

Osy oraıda oblys ákiminiń orynbasary Ermek Alpysov taǵy bir ortalyqtyń ashylatynynan habardar etti.

– Qazirgi ýaqytta erte aralasý ortalyǵy júıeli jumys istep tur. Endi 18 jasqa deıingi balalarǵa ar­nal­­ǵan ońaltý ortalyǵy ashylady. Mamandarymyzdy úıretken, osyndaı zamanaýı qural-jabdyqtarmen qamtamasyz etken «Samruk-Kazyna Trust», «Qazaqstan halqyna», «Qam­qor­lyq» qorlaryna alǵys aıtamyz. Mundaı áleýmettik joba Balqash, Shahtınsk qalalarynda da jalǵasyn tabady dep oılaımyn, – dedi E.Alpysov.

Osylaısha aımaǵymyzda erek­she balalarǵa jasalyp jatqan qam­qorlyq aıtarlyqtaı-aq. Tájirıbeli mamandar men ata-analardyń birlese atqarǵan jumysynyń nátıjesi balanyń damýyna zor yqpal ete alady.

Qaraǵandy oblysy