Almatyda Keden odaǵy aıasynda biryńǵaı keden aımaǵyn qurý, sonymen qatar Qazaqstan Respýblıkasyna jeke tulǵalardyń jeńil kólik quraldaryn jáne taýarlardy ákelý tártibin ózgertýge arnalǵan dóńgelek ústel bolyp ótti.
Búgingi tańda kún tártibinde turǵan bul máseleler týraly Ekonomıkalyq damý jáne saýda mınıstri Janar Aıtjanova baıandady.
Qazaqstannyń Keden odaǵyna enýindegi eń basty jáne eń ózekti maqsat – elimizdiń ınvestısııalyq tartymdylyǵyn arttyrý bolyp otyr. Statıstıkalyq derekterge úńilsek, otandyq ekonomıkaǵa 1993-2009 jyldar aralyǵynda 108 mıllıard dollar sheteldik ınvestısııa tartylǵan. Onyń 70 paıyzǵa jýyǵy óndirýshi sektorǵa, al, bar bolǵany 10 paıyzdan da tómendeý bóligi ónim óńdeý salasyna jiberilgen. Eksporttaýda da munaı, metall jáne ózge de shıkizattar úlesi aıtarlyqtaı mol. Sondyqtan da qalyptasqan jaǵdaıdy ózgertý qajet, el rynogynyń 16 mıllıon adamnan 170 mıllıon adamǵa ulǵaıýynyń bereri mol, – dedi Janar Seıdahmetqyzy.
Jeńil ónerkásip kásiporyndary assosıasııasynyń basqarmasy tóraıymy Lıýbov Hýdova jáne Qazaqstan Jıhaz jasaýshylar jáne aǵash óńdeý ónerkásibi assosıasııasynyń prezıdenti Mıhaıl Glýhov zańdy túrde jumys isteıtinderge kóleńkeli, astyrtyn bıznespen aınalysatyndardyń tıgizetin zııanynyń mol ekendigin tilge tıek etti.
Degenmen, keń baıtaq elimizde jańa kásiporyndar qurylyp, óndiris qarqynyn arttyrý tabysqa jeteleı bermek. Negizgi túıin osy.
Baqyt BALǴARINA, Almaty.