Qutqarýshylar eńbegi qashanda qurmetke ıe. El de qıyn-qystaýda qolushyn berýge ázir, janashyrlyǵy mol osy bir mamandyq ıelerin qurmetteıdi. Taıaýda aq borannyń ishinde adasqan, aıy-kúni jetip otyrǵan áıeldi aman alyp qalǵan qutqarýshynyń esimi nárestege berildi.
Sol kúni Ereımenniń etegi tútegen boran bolatyn. Qarǵa adym jer atap basý – muń. Tórtkúl dúnıe aq shymyldyq jamylǵan. Aıaz da ashýyna mine bastapty. Áldebir sharýanyń yńǵaıymen jolǵa shyqqan jolaýshylar adasyp ketken. Aralarynda álgi áıel de bar. Jolaýshylar bylaı tursyn, saılanyp shyqqan qutqarýshylardyń ózi aq boranda oń-solyn ańǵarmastaı. Shuǵyl habar túskennen keıin adamdardy qutqarýǵa asyqqan olardyń da denesin úsik shalǵan. Áıtse de kórer jaryǵy, tatar dámi taýsylmaǵan eken, barlyǵy din aman.
Jol ústindegi azapty tartqanymen, aman qalǵan ana perzenthanadan shyqqanda aq túıeniń qarny jarylǵan qýanyshqa qutqarýshy da barypty. Jaryq dúnıege shekesi torsyqtaı ul kelgen. Otbasy bolyp aqyldasa kele, perishtedeı jebep, demep, aq borannan aman qalýlaryna sebepshi bolǵan qutqarýshy Amangeldi Doskenovtiń esimin sábıge bergen. Sóz arasynda bul otbasynyń jetinshi balasy ekendigin aıta ketelik.