Shyǵys Qazaqstan oblysynyń turǵyndary Bekbolat Saǵıevtyń otbasyn «sportshylar januıasy» dep ataıdy. Bekbolat kúresten sport sheberi, kezinde respýblıkalyq, oblystyq, halyqaralyq saıystarda san márte jeńis tuǵyrynan kóringen. Al onyń uly Jasulan da – sportty ózine serik etken, qoıan-qoltyq jekpe-jek sheberlerin baptap, túrli jarysta júlde terip júrgen sańlaq.
Jaqynda Bekbolattyń uly Jasulan habarlasty:
– Aǵa, ótken jyldyń aıaǵy men osy jyldyń basy biz úshin jemisti boldy, – dedi ol.
Byltyr 25 qarashada Qaraǵandy qalasynda Nomad MMA-dan Álem kýbogi ótti. Dúbirli jarysta eki túlegimiz – Qyrmyzy Toqtamys pen Aıarý Qurmanbek altynnan alqa taqty. Odan bir apta buryn Qostanaı qalasynda jalaýy jelbiregen MMA Bırman boksynan el chempıonatynda Qyrmyzy Toqtamys, Aıajan Qabylhan, Islam Qýanyshuly chempıon atansa, Mádı Altynbek, Ámiráli Bekbolat, Alan Orazbekov, Aıarý Qurmanbek kúmispen kúpteldi. Arada bir aıdan soń Bahreınde ótken Azııa chempıonatynda Qyrmyzy Toqtamys ekinshi orynǵa taban tiredi. Qarjynyń tapshylyǵynan júlde alady degen birneshe sportshymyz jarysqa bara almady. Jaqynda ǵana О́skemende ótken ponkratıonnan óńir birinshiliginde 11 shákirtimiz altynnan alqa taqsa, bes túlegimiz ekinshi orynǵa ıe boldy. Endi olar respýblıkalyq jarysqa daıyndalyp jatyr.
Birer aıda osynshama jarysqa qatysyp, júlde tergen О́skemenniń jekpe-jek sheberleri jeńiske jattyǵýlar men izdenistiń arqasynda jetkenderi belgili. Qyrmyzy Toqtamys – álemniń úsh dúrkin chempıony, Azııa jeńimpazy. Al Bekbolattyń nemeresi Ámiráli osy sportta tamasha jetistikterge jetti. Oblystyń birneshe dúrkin chempıony, Reseıdiń Ekaterınbýrg qalasynda jalaýy jelbiregen aralas jekpe-jek jarysynan ekinshi orynmen oraldy.
Ákeli-balaly Bekbolat pen Jandos Saǵıevtardyń shákirtteri áli talaı bıik belesti baǵyndyratyndary sózsiz. Qarjy tapshylyǵyna qaramastan alys elderge sapar shegip, ózderiniń sheberligin kún saıyn shyńdap júrgen óskemendik órenderge sáttilik serik bolsyn degimiz keledi.
Ońdasyn ELÝBAI,
jýrnalıst
О́SKEMEN