Májilis depýtaty, «Amanat» partııasy fraksııasynyń múshesi Erbolat Satybaldın Bas prokýror Berik Asylov pen Ekologııa jáne tabıǵı resýrstar mınıstri Erlan Nysanbaevqa aqbókenderdiń aıaýsyz qyrylýyna qatysty depýtattyq saýal joldady. Onda salalyq mınıstrlik qabyldaǵan reglamentke saı jumys atqaryp jatpaǵanyn jetkizdi.
E.Satybaldınniń aıtýynsha, kezinde 2 mıllıonǵa deıin ósken kıiktiń sany 2003 jyly 21 myń basqa kemip ketken.
«Byltyrdan beri «kıiktiń qatary qoıýlanyp ketti, eginge túsedi» degen sharýalardyń ýájin estip jatyrmyz. Sol sebepti 2024 jyldan bastap kıikti azaıtýǵa memlekettik organdardan resmı túrde ruqsat berildi. Alaıda quzyrly oryndar «azaıtý» degendi «aıaýsyz qyrý» dep túsingen sııaqty. Taıaýda Ulytaý oblysy Jańaarqa aýdanynyń Qyzyljar aýylynda «Ohotzooprom» О́B qyzmetkerleriniń kıik sanyn azaıtý jeleýimen býaz kıikterdi atyp jatqany jergilikti turǵyndardyń narazylyǵyn týdyrdy», dedi depýtat.
Bul rette ol kıikterdiń popýlıasııasyn sharýalarǵa zııan tıgizbeıtindeı, halyqty dúrbeleńge salmaıtyndaı etip retteý qajettigin eske saldy. Onyń aıtýynsha, «Ohotzooprom» О́B qyzmetkerleriniń jasaǵan bul qadamyna quzyretti oryndar quqyqtyq baǵasyn berýi kerek.
«Atalǵan mekeme qyzmetkerleriniń salalyq mınıstrlik qabyldaǵan reglamentke saı jumys atqarmaǵany belgili boldy. Birinshiden, aqbókender aýyl mańyna 10 shaqyrym jaqyndaǵanda jaýapty mekeme qyzmetkerleri eldi dúrliktirmeı, halyqqa birinshi kezekte qulaqtandyrý, aqparattandyrý jumystaryn júrgizýi kerek. Ekinshiden, aqbókenderdiń popýlıasııasyn shekteý sharalaryn oryndaý – jappaı qyrý emes. Aqbókender tabynyn sanıtarlyq retteý úshin aqsaq-toqsaǵyn, kári-qurtańyn, aýrý-syrqaýyn birinshi nysanaǵa alý kerek. Úshinshiden, eń bastysy, aqbókendi býaz kezinde azaıtý sharalary iske asyrylmaýǵa tıis», dedi E.Satybaldın.
Osy jaıttardy eskere kele, ol atalǵan vedomstvo basshylaryna depýtattardyń mynadaı usynystaryn jetkizdi: «Bas prokýratýra máseleniń mánin tereń qarastyryp, «Ohotzooprom» О́B qyzmetkerleriniń is-áreketterine quqyqtyq baǵasyn berýi kerek; Ekologııa jáne tabıǵı resýrstar mınıstrliginiń kıik sanyn azaıtýǵa baǵyttalǵan sharalardy tolyq pysyqtap, tıisti reglamentke ózgerister engizýi qajet; Tıisti reglamentke kıikterdiń tabynyn retteýdi aqbókenniń laǵy aıaqtanǵan kezeń men kúıekke túser mezgil arasynda, ıaǵnı qazan, qarasha aılarynda iske asyrylýǵa tıis degen ózgeristiń engizilgeni mańyzdy; Kıikti atýdyń maýsymdyq sharalaryn iske asyrýda jaýapsyzdyq tanytqan qyzmetkerlerge shara qoldanylsyn».