Jýyrda Aqan seri atyndaǵy Soltústik Qazaqstan oblystyq fılarmonııasynyń estradalyq-sımfonııalyq orkestri Úndistan eline baryp, onyń Mýmbaı, Delı, Bangolor, Maısorı degen qalalaryna gastroldik saparǵa shyǵyp, qazaq óneriniń tabystaryn kórsetip keldi. Biz osy ujymnyń dırektory Botagóz Aqmaǵambetovaǵa jolyǵyp áńgimelesken edik.
Onyń aıtýyna qaraǵanda, gastroldik sapardyń uıymdastyrylýyna Úndistannyń Qazaqstandaǵy elshisi doktor Nagendra Prasat myrza uıytqy bolǵan. Ol Petropavlǵa kelgen saparynda Astanadaǵy úndi mádenı ortalyǵymen baılanysyp, fılarmonııada olardyń bılerin, ıoga ónerin úırenip júrgen qyzyljarlyq jastarǵa rıza bolyp, ónerli jastardyń Úndistanǵa da baryp, ónerlerin kórsetýi týraly usynys jasapty.
Jańa jyldan keıin Astananyń 35 adamdyq kameralyq hory da Úndistanǵa bara jatqanyn bilgen soń bizdiń fılarmonııa ujymy da solarmen birge gastroldik saparǵa shyǵady. Úndistan elinde olardyń kólik, tamaq shyǵyndaryn qarsy alýshy jaq kótergen.
«35 adamdyq orkestrdiń jolsaparyna jetetin qarajatty ózderiniń aqyly qyzmetterinen túsken qarajat ári ákimdiktiń qoldaýymen taptyq. Dırıjerimiz Almas Muhıtdınovty toptyń jetekshiligine taǵaıyndadyq. Ár qalada bir retten konsert qoıdyq. Ony dombyrashymyz Ashat Galıev ashyp otyrdy. Eki shekti dombyradan osynshalyq keremet áýen tógilgeni úndilikterdi tań qaldyrǵanyn kórip, shattanyp otyrdyq. Fleıtashy qyzymyz Tamara Porfırevanyń ónerine de kórermender barynsha rıza boldy. Basqa da án-kúılerimiz, mýzykalyq oryndaýlarymyz kórermenderdi ábden rıza qyldy. Úndiler bizdiń ónerpazdardan mundaıdy kútpegen sııaqty, barynsha tań qalyp, qol soqty. Mýmbaı qalasynda osyndaǵy úlken sımfonııalyq orkestrge jetekshilik etip júrgen jerlesimiz Marat Beısenǵalıevpen de kezdestik. Bizdiń konsertterimizge úndilik ánshiler men bıshiler de qosylyp otyrdy. Mýmbaı qalasynda Lakshmınarıan atty ózderiniń mýzykalyq festıvaline bizdiń ónerpazdarymyz qonaq retinde qatysyp, ónerlerin kórsetti. Gazetter bizdiń ónerpazdarymyz týraly «álemdik dárejedegi orkestr» dep maqtap jazǵandaryna qatty qýandyq», dedi ol.
Qazaq ónerpazdardy qazaq, orys, Eýropa elderi jáne úndiniń keń taraǵan kompozıtorlarynyń shyǵarmalaryn oryndaǵan. Sóıtip, úndi halqynyń óner súıer qaýymy Qazaqstan ónerimen keńinen tanysyp, onyń jetisterin kórip, mýzykantardyń ulttyq jáne álemdik aspaptarmen sheber oınaıtyndyǵyna tánti bolǵan. Shyn máninde «mýzykada shekara joq» degen osy shyǵar.