2024 jyly UBT-daǵy pánderdiń sany ózgerissiz qalady, dálirek aıtqanda, talapkerler úsh mindetti jáne tańdaý boıynsha eki pánnen test tapsyrady, dep habarlaıdy Egemen.kz QR ǴJBM Ulttyq testileý ortalyǵynyń baspasóz qyzmetine silteme jasap.
Bıyl «Oqý saýattylyǵy» men «Matematıkalyq saýattylyq» mindetti pánderinen tapsyrmalar sany 5 suraqqa qysqardy. Bul beıindik pánder boıynsha suraqtar sanyn 40-qa deıin arttyrýǵa múmkindik berdi. Sonymen qatar beıindik pánderde berilgen tizimnen sáıkestikti anyqtaýǵa arnalǵan 5 tapsyrma qosyldy. Bul ózgerister – test tapsyrmalarynyń sapasyn arttyrý men olardyń fýnksıonaldyq saýattylyq pen synı oılaý daǵdylaryn baǵalaýdyń álemdik standarttaryna sáıkestigi baǵytyndaǵy jumystardyń qısyndy jalǵasy.
«Osylaısha, UBT tapsyrmalar sany ózgerissiz qalady, jalpy 120 suraq. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrma. Joǵary ball – 140, ol da ózgerissiz qaldy», dep túsindirdi QR ǴJBM Ulttyq testileý ortalyǵynyń dırektory Rýslan Emelbaev.
Testileý ýaqyty – 4 saǵat (240 mınýt). Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalatynyn aıta ketý kerek.
Shyǵarmashylyq baǵytty tańdaǵan talapkerler ótken jyldardaǵydaı UBT-ny eki pán «Qazaqstan tarıhy» (20 tapsyrma, shekti ball – 5) jáne «Oqý saýattylyǵy» (10 tapsyrma, shekti ball – 3) boıynsha tapsyrady. Tapsyrmalardy oryndaý ýaqyty – 70 mınýt. Al shyǵarmashylyq emtıhandar joǵary oqý oryndarynda ótedi.