Shyǵarmashylyq álemi halyq ómiriniń aınasyna aınalǵan qaharman sıýjetterden bastaý alatyn Raqymjan Sadyǵulov, qazaq beıneleý ónerinde ózindik orny bar sheber sýretshi. Á.Qasteev atyndaǵy óner mýzeıinde sýretshiniń «Bul – meniń álemim» atty jeke kórmesi ashyldy. Ondaǵy keskindeme, grafıka jáne gobelennen quralǵan 70-ke jýyq týyndynyń árbiri shyǵarmashylyq ıesiniń baı tanymynan habar beredi.
Aıtýly sheber shyǵarmashylyq ómirinde 150-ge jýyq týyndyny jaryqqa shyǵardy. Sándik-qoldanbaly óneriniń sheberi, mazmuny tereń, kompozısııalyq qurylymy keń «Jańa qala», «Meniń baǵym», «Tomırıs», «Shamandar», «Máńgilik», «Ańyraqaı shaıqasy» syndy iri gobelenderdiń avtory. Kórmede óner ıesiniń «Ǵasyrlar jańǵyryǵy» (1995), «Dombyra» (1985), «Kúz» (1985) atty gobelenderi aıryqsha kózge túsedi. Kórmeniń negizgi bóliginen sýretshiniń keskindemelik týyndylary oryn alǵan.
Avtor óz shyǵarmashylyǵynda halyqtyń dástúrli turmysy men kóne dala órkenıetiniń mıfologııasyna, tarıhy men mádenıetine basty nazar aýdarady. Ásirese «Ǵasyrlar toǵysynda», «Abylaıhan shaıqas aldynda» (1998), «Tomırıs» (2011), «Uly dala jádigeri» (2014), «Aıshabıbi» (2015), «Arý sezimi» (2016), «Túrik qaǵanaty» (2019), «Umaı – ana» (2019) sekildi keń tynysty shyǵarmalary óner keńistiginde moıyndalǵan irgeli izdenister.
«Raqymjan Sadyǵulov – beıneleý óneriniń birneshe janryn sheber meńgergen, ártúrli tehnıkada erkin jumys isteı alatyn talant ıesi. Sýretshi shyǵarmashylyǵyn shabyttandyratyn bastaýlar qazaqtyń halyq óneri men tarıhı tulǵalary. Avtordyń shyǵarmashylyǵyna tán erekshelikter – qanyq kolorıt, tústik qatardyń batyl kontrasty. Onyń keskindemesi tústik jaryqpen nurlanǵan stılıstıkasy sándilikke jaqyn. Avtordyń oı-sanasy men rýhyn ǵasyrlyq mádenı qundylyqtarmen sýsyndatqan dástúrli qazaq áleminiń beıneleri rýhtandyrady», deıdi kórme jetekshisi, ónertanýshy Laýra Ábildaeva.
О́nertanýshy atap ótkendeı, R.Sadyǵulov teorııa men tájirıbeni, arnaıy pánderdi oqytý ádistemesin jetik meńgergen kásibı deńgeıi joǵary maman. Ol «Sándik-qoldanbaly óner» mamandyǵy boıynsha birneshe oqý-ádistemelik quraldardyń, ǵylymı maqalalardyń jáne beıneleý óneri mamandandyrylǵan termınderiniń qazaqsha-oryssha-aǵylshynsha túsindirme sózdiginiń, O.Tańsyqbaev shyǵarmashylyǵyna arnalǵan kitaptyń avtory.
Sýretshi 30 jyldan beri óz shyǵarmashylyǵymen birge ustazdyq qyzmetti de qatar alyp júr. Onyń jan dúnıesi, kásibi, ómir tynysy ónerden óris tapqan. Mazmundy is-sharanyń ashylý saltanatyna qatysqan zııaly qaýym Sadyǵulov qoltańbasy haqynda paıymdy pikir aıtty.Almatylyqtar men qala qonaqtary ekspozısııany 16 aqpanǵa deıin tamashalaı alady.
ALMATY