3-4 aqpan kúnderi Ońtústik Amerıka qurlyǵyndaǵy eń kórikti qalalardyń biri Rosarıoda Devıs kýboginiń irikteý saıysy ótedi. Bul básekede Qazaqstannyń ulttyq quramasy Argentına tennısshilerine qarsy oınaıdy.
Atalǵan jarysqa elimizdiń birinshi raketkasy Aleksandr Býblık qatyspaıdy. Sebebi ol Parıj Olımpıadasynyń joldamalary sarapqa salynatyn Monpeledegi týrnırde baq synaýdy qup kórip otyr. Sonymen qatar Beıbit Juqaevty da Rosarıo kortynan kórmeımiz. Resmı derekterge súıensek, asa daryndy qandasymyz Aýstralııadaǵy dodada alǵan jaraqatynan áli de aıyǵa almaı júrgen kórinedi. Sóıtip, Argentınaǵa qarsy kezdesýde Denıs Evseev (álemniń 184-raketkasy), Tımofeı Skatov (álemniń 227-raketkasy), Dmıtrıı Popko (álemniń 358-raketkasy) jáne Aleksandr Nedovesov ((juptyq saıysta álemniń 46-raketkasy) el namysyn qorǵaıdy.
Al qarsylastarymyz jaıynda ne bilemiz? Argentına quramasynyń Devıs kýbogine qatysyp kele jatqanyna týra bir ǵasyrdan asty. Alǵash ret olar 1923 jyly baq synady. Sol kezden beri bes ret aqtyq synǵa deıin alqynbaı jetti. 1981 jyly Ońtústik Amerıkanyń oǵlandary fınalda AQSh-tan (1:3) utyldy. 2006 jyly Reseıge (2:3) jol berdi. 2008 jáne 2011 jyldary Ispanııanyń (1:3, 1:3) osal tusyn taba almady. Esesine 2016 jyly argentınalyqtardyń asyǵy alshysynan tústi. Týrnır barysynda Polsha (3:2), Italııa (3:1), Ulybrıtanııa (3:2) jáne Horvatııadan (3:2) basym túsip, bas júldeni oljalady. Sol juldyzdy komandanyń sapynda Hýan Martın del Potro, Federıko Delbonıs, Leonardo Maıer jáne Gıdo Pelıa syndy sańlaqtar jasyndaı jarqyldaǵan edi.
Qazirgi kezde Argentınanyń sapynda úsh myqty tennısshi bar. Olar – Fransısko Cherýndolo, Sebastıan Baes jáne Tomas Martın Etchevarı. Barlyǵy da – 23–25 jas aralyǵyndaǵy órimdeı jastar. ATR reıtınginde 22-orynǵa turaqtaǵan Cherýndolo byltyr Rolan Garrostyń tórtinshi kezeńine deıin jetti. Ol Bostada men Istborndegi týrnırlerde top jaryp, Býenos-Aıres pen Lıondaǵy básekelerdiń fınalynda oınady.
Úzdikter tiziminde 25-oryndy ıelenip otyrǵan Baes kezinde jasóspirimderdiń Dúnıejúzilik Olımpıadasy men Rolan Garrostyń aqtyq synynda óner kórsetip, óz qatarlastary arasynda álemdik reıtıngte kósh bastady. ATR sanatyndaǵy týrnırlerde tórt ret qarsylas shaq kelirmedi. Bıyl Aýstralııanyń ashyq birinshiliginiń úshinshi aınalymynda súrindi.
2023 jyly Etchevarı Rolan Garrostyń shırek fınalynda oınasa, kúni keshe ǵana Melbýrndegi jarystyń úshinshi kezeńinde jeńilis tapty. Bul kúnderi ol ATR reıtınginde 28-oryndy oljalap tur. Buǵan qosa 28 jastaǵy Pedro Kachın men 23 jastaǵy Fakýndo Dıasty da atap ótýge bolady. Ekeýi de TOP-100 tennısshiniń qatarynda.
Sheshýshi tusta Argentına qurmasynyń kapıtany Gılermo Korıa qatarǵa tájirıbesi ábden tolysqan Dıego Shvarsmandy qosýy múmkin. Qazirgi kezde ol ATR tiziminde 126-orynda turǵanymen, osydan úsh jyl buryn ǵana álemniń segizinshi raketkasy atandy. Dáýiri júrip turǵan kezinde 31 jastaǵy Shvarsman Rolan Garrostyń jartylaı fınalyna deıin jetip, US Open dodasynda eki ret segiz myqty oıynshynyń qataryna qosyldy. ATR týrnırlerin ol tórt ret utyp, 10 ret aqtyq aıqasta ese jiberdi. Mine, Rosarıoda jerlesterimizge osyndaı qarýly komandamen kúsh synasýǵa týra keledi.