Berel aýyldyq kitaphanasynda «Oqýǵa qushtarmyz» aptalyq aıasynda aýyldyń jastarynan bastap, zeınetkerlerge deıin «Egemen Qazaqstan» respýblıkalyq gazetin oqydy.
Internet jelisi júıtkip turǵanymen, tańǵy shaıyn gazet oqı otyryp ishetin oqyrmandarymyz barshylyq. Ásirese aýyldyq jerlerde gazet-jýrnaldy kútip júrip oqıdy.
Kúni keshe Berel aýyldyq kitaphanasynda ótken rýhanı sharaǵa qatysqan aýyldyqtar aqparatty qalta telefonnan góri gazetten alǵan anaǵurlym tıimdi ekenin aıtqan. Aksııa maqsaty da telefondy bir sátke ysyra turyp, gazet betterinen tanymdyq, rýhanı dúnıelerdi oqýǵa shaqyrý edi. Kitaphanashy Aınagúl Shaıahmettiń aıtýynsha, aýylda ınternet bolǵanymen, baspasózge jazylý naýqanynda ózderi súıip oqıtyn gazetterine jazylyp, jyl boıy úzdiksiz alyp otyrady.
«Berelge ınternet tartylǵanymen, aýyldyqtardyń burynǵydaı qalap oqıtyn gazetteri bar, jylda jazylatyn ádetteri bar. Kitaphanaǵa jańadan kitap tússe, ony da oqyp taýysatyn oqyrmandarymyz joq emes. Solarǵa qarap, kitap, gazet oqý mádenıetiniń baryna qýanamyz» deıdi kitaphanashy Aınagúl Shaıahmet.
Iá, ınternet órkenıeti kelgenimen, gazet oqý mádenıetinen ajyrap qalmaýymyz kerek. Gazetke basylǵan aqparat erteńgi kúni tarıhta qalmaı ma? Aqparattan ózge qundylyǵyn joımaıtyn qanshama dúnıe bar. Al ekran betindegi jazbalardyń san ǵasyr saqtalatynyna kim kepil?
«Baspasózge jazylý naýqany bastala sala «Egemenimizge» jazylyp qoıamyn. Gazetke jazylý ádetim. Ár nómiri kelgen saıyn kózildirigimdi ilip alyp, paraqtap otyryp oqımyn. Birinshi betten problemalyq maqalalarǵa deıin beriledi» deıdi Berel aýylynyń turǵyny Oralbek Ábenov.
Aıta keterligi, Katonqaraǵaı óńiri gazet oqýda aldaryna jan salmaıdy. Ony jyl sońyndaǵy statıstıkalyq derekter kórsetip otyr.
Shyǵys Qazaqstan oblysy,
Katonqaraǵaı aýdany,
Berel aýyly