Jaqynda Aqtóbe oblysynyń delegasııasy Ońtústik Koreıa men Qytaıǵa baryp eki eldiń isker toptary men týrızm salasyndaǵy birqatar kompanııa ókilderimen kezdesip qaıtty. Seýl, Pekın men Shanhaı qalalaryndaǵy júzden asa týrıstik kompanııa ókilderimen kezdesýde «Visit Aktobe» týrıstik aqparattyq ortalyǵy Aqtóbe óńirin tartymdy týrıstik baǵyt retinde qalyptastyrýdyń strategııasyn usyndy. Sonyń eń bastysy – ánshi Dımash Qudaıbergen atyndaǵy «Dimash tour» jobasy.
Talantty ánshiniń týǵan jeri, ósken ortasy, oqyǵan jeri týraly bilgisi keletin sheteldik týrıster úshin ashylatyn múmkindikter týraly «Visit Aktobe» týrıstik aqparattyq ortalyǵynyń dırektory Ersaıyn Súıinov aıtyp berdi.
– «Dimash tour» jobasyna Aqtóbedegi Dımash Qudaıbergenniń ósken úıi, oqyǵan mektebi men alǵashqy mýzykalyq qabiletin ashqan Ahmet Jubanov atyndaǵy mýzyka kolledjin de qosyp otyrmyz. Eń aldymen, qonaqtar Aqtóbedegi oblystyq tarıhı-ólketaný mýzeıine kelip, halqymyzdyń tarıhymen, etnografııasymen tanysady. Sodan keıin Dımash oqyǵan mektepti kórip, ári qaraı mýzyka kolledjine keledi. Bul jerde Dımashtyń ustazy, ánshi ári oqytýshy, Qazaqstannyń eńbek sińirgen qaıratkeri Marat Áıtimovpen kezdesý uıymdastyrylyp, ol Dımash oqyǵan dárishanada qonaqtarǵa sheberlik sabaǵyn ótkizedi. Kolledj ǵımaratynda konsert uıymdastyrylyp, qoıylymdar usynylady. Odan keıingi baǵyt – Dımash Qudaıbergenniń týǵan úıi. Bul úı qazir mýzeıge aınalǵan. Sheteldikterge Aqtóbeniń kórikti jerleri men tarıhı oryndary da tanystyrylady. Oǵan Tahaýı Ahtanov atyndaǵy drama teatry, «Nur-Ǵasyr» meshiti, kafedraldy shirkeý kiredi. Ońtústik Koreıa men Qytaıǵa barǵan toptyń ishinde Dımash Qudaıbergenniń ustazy Marat Áıtimov te boldy, – dedi E.Súıinov.
Keıingi jyldary Aqtóbe oblysynda tarıhı, ekologııalyq týrızm baǵyty birshama damyp keledi. Baıǵanın aýdanyndaǵy Aqtolaǵaı borly qyrattary men Aqqum qumdary, Qarǵaly aýdanyndaǵy Mylqaý taý, Qarǵaly sý qoımasy men Qasqyr sarqyramasy, Mártók aýdanyndaǵy aqqaıyń toǵaıy, Muǵaljar aýdanyndaǵy Orqash tabıǵı qoryǵy, Oıyl aýdanyndaǵy Barqyn qumdary, Yrǵyz aýdanyndaǵy «Yrǵyz-Torǵaı» tabıǵı rezervaty aqtóbelikter men ekologııalyq týrızmdi unatatyndarǵa jaqsy tanymal. Ásirese jaz aılarynda tabıǵaty bir-birine uqsamaıtyn osy jerlerdi tamashalaǵysy keletinder sany artady. Keı týrıster jerdiń shalǵaılyǵyna qaramastan Baıǵanın aýdany men Yrǵyz aýdanyndaǵy tabıǵat aıasyna eki-úsh kún qonyp, taý-tasyn aralap kelýge óte yqylasty.
Búginde Aqtóbe oblysyndaǵy kıeli jerlerge aparatyn marshrýttar da jaqsy jolǵa qoıyldy. Máselen, Oıyl aýdanyndaǵy Kókjar jármeńkesi, Temir aýdanyndaǵy Dosjan ıshan meshiti, Alǵa aýdany Bestamaq aýylyndaǵy Eset Kókiuly kesenesi, Qobda aýdanyndaǵy Abat Baıtaq pen Qobylandy batyr kesenesi, Áıteke bı aýdanyndaǵy Han molasy, Shalqar aýdanyndaǵy Eset-Dáribaı kesenesi kıeli oryndardy zııarat etýshilerge jaqsy tanymal.
E.Súıinovtiń aıtýynsha, 2023 jyly Aqtóbe oblysyna kelgen týrıster sany 2022 jylmen salystyrǵanda 33,5%-ǵa kóbeıgen. Resmı statıstıka boıynsha 2023 jyldyń alǵashqy toǵyz aıynda óńirge 36 668 týrıst kelse, basqa elderge týrıstik joldamamen 34 542 aqtóbelik shyqqan. Osy málimet óńirde ishki týrızm baǵytynyń jylma-jyl damyp kele jatqanyn kórsetedi. Dımashtyń tabıǵı talantyna, joǵary oryndaýshylyq ónerine tánti bolǵandar onyń ushqan uıasyn kórýge, qazaq halqynyń mádenıetimen tanysýǵa asyǵady. Jyl saıyn Dımashtyń týǵan jerin kórýge shetelden 100-den asa týrıst keledi. Byltyr Dımashtyń áni arqyly qazaq mádenıetin tanýǵa qushtar bolyp kelgen sheteldikter úshin Aqtóbede birneshe týr uıymdastyryldy.
Seýl qalasynda ótken «Road Show» sharasy kezinde ońtústikkoreıalyq ánshi Son Von Sab Aqtóbe oblysynyń týrıstik ambassadory bolýǵa nıet bildirgen. Qazaq jáne koreı ánderin shyrqaıtyn Son Aqtóbege kelip «Visit Aktobe» týrıstik ortalyǵymen yntymaqtastyqty damytý jóninde memorandýmǵa qol qoıdy. Ambassador Ońtústik Koreıada qazaq óneri men mýzykasyn nasıhattap qana qoımaı, bizdiń jaqqa týrıster baǵyttap otyrmaqshy.
Osylaısha, óner arqyly halyqtar mádenıetin jaqyndastyrý «Aqtóbe oblysynyń týrıstik ambassadorlary» men «Dimash tour» arqyly jalǵaspaqshy. Maqsat – tanymal tulǵalar arqyly aımaqtyq týrızmdi damytý. Syrttan keletin týrısterdi ózgeshe jolmen, tyń marketıngtik strategııalar arqyly tartý tez nátıje beredi.
Aqtóbe oblysy