El astanasynda belgili teatr rejısseri, Qazaqstannyń eńbek sińirgen óner qaıratkeri Bolat Atabaev týraly túsirilgen «Myń jyldyq oıyn» derekti fılminiń tusaýkeseri ótti. Avtory – jýrnalıst-jazýshy Qanat Tileýhan.
Avtordyń aıtýynsha, fılmdi túsirý 2021 jyly, rejısserdiń 70 jyldyǵyna oraı josparlanǵan. Týyndynyń túsirilýine telejýrnalıst, Májilis depýtaty Maqsat Tolyqbaıdyń dáneker bolýymen kásipker Mahat Tóreáli demeýshilik kórsetken.
«2021 jyly Bolat Atabaevtyń 70 jyldyǵy edi. Soǵan oraı túsirse degen áýelde oı bolǵan. Biraq onyń reti bıyl keldi. Bolat aǵamen alǵash televıdenıeniń jańalyqtar qyzmetinde júrgen kezde tanysyp edim. «Qazaq jýrnalısteri sıyr sııaqty shoryldatyp sıgendeı ǵyp jazýdy qashan qoıasyńdar. Problemany birden naqty jazbaısyńdar ma» deıtin. «Myń jyldyq oıyndy» bitirip alyp, birneshe ret qarap shyqtyq. Bolat aǵa ózi kórse, ne bolar edi dep oılap kettim de shoshyp kettim», deıdi Qanat Tileýhan.
Fılm saıası ustanymy úshin elden jyraq ketken rejısserdiń jan-dúnıesin ashyp, kórermenge jaqynnan tanytty. Kóp jerde jarııalanbaǵan Bolat Atabaevtyń beınejazbalary, Qanat Tileýhannyń odan alǵan suhbattary men «Korol Lır» qoıylymy astasyp túsirilgen. Fılmniń bastapqy ataýy «Abaıdyń dosy» dep tańdalǵan. Alaıda teatr rejısseriniń shákirti Azamat Sharǵynnyń usynysymen «Myń jyldyq oıyn» bolyp ózgertilipti.
«Teatrdyń myń jyldyq oıyny áli jalǵasyp jatyr. Avtorıtarlyq júıeniń, dıktatorlyq bıliktiń sonaý Rım ımperııasynan bergi ımperatorlardyń halyqpen oınaýyna da myń jyl. Osy myń jyldyq oıyndardyń arasynda basyn tasqa da, taýǵa da soqqan rejısserdiń beınesin jasaýǵa múmkindigimizshe tyrystyq. Árıne, Ermek Tursynov aıtqandaı, Bolat aǵa – eń birinshi kezekte sýretker. Bul – teatrdyń qarsylyǵy, teatrdyń kúresi. О́ner arqyly ol kisi óziniń sózin aıtqysy keldi. Erkindik, demokratııalyq qundylyqtardy dáriptegisi keldi», deıdi fılm avtory.
Fılmdi tamashalaǵan belgili jazýshy-dramatýrg, Abaı atyndaǵy Memlekettik syılyqtyń laýreaty Roza Muqanova týyndy jáne onyń keıipkeri týraly tebirene kele: «Bolat Atabaev shyn máninde teatrdyń reformatory boldy», dep atap ótti.
Sondaı-aq birtýar rejısserdiń ónerdegi talaby ómirde de ózekti ekeni aıtyldy.
«Bolat Atabaevtyń myqty rejısserligi óz aldyna, ol osy kúndelikti ómirde de ádildik úshin kúresip ótken qaıratker jáne sol shynaıylyqty sahnadan da talap etetin», dedi Maqsat Tolyqbaı.
Aıta keteıik, tusaýkeserge zııaly qaýym men teatr jastary, óner salasynda bilim alyp jatqan stýdentter, marqumnyń týystary jınaldy.
Talantty rejısser, azamattyq ustanymy berik er esimi keıingi urpaq sanasynda óshpese kerek-ti. Tulǵa ómirinen syr shertetin osyndaı týyndylar da Atabaev esiminiń eskirmeýine úles qosar.