Jyl saıyn Almaty qalasynda qolqa qaqpaqshasy tarylǵan 20-22 naýqasqa operasııa jasalsa, osyndaı hırýrgııalyq operasııaǵa muqtaj naýqastardyń sany 200-250-ge deıin jetip jyǵylady. Osy oraıda Almatydaǵy Kardıologııa ortalyǵynda júrekke joǵary tehnologııalyq jáne zaqymy barynsha az operasııa jasaıtyn TAVI ortalyǵynyń ashylýyn megapolıs medısınasyndaǵy ilkimdi oqıǵalar qataryna qosar edik.
Endigi jerde elimizde júregine ashyq operasııa jasaýǵa bolmaıtyn aýyr naýqastardy ınnovasııalyq ádispen emdeýge bolady. Ortalyqta tarylǵan qolqa qaqpaqshasyn júrekke ashyq operasııa jasamaı-aq, tamyr arqyly aýystyrýǵa bolady. «Qolqa qaqpaqshasynyń stenozy» dıagnozyna joǵary tehnologııalyq operasııanyń bul túri narkozsyz jasalady ári aǵzaǵa zaqymy barynsha az. Qysqasy, kózimiz úırengen dástúrli hırýrgııamen salystyrǵanda naýqas tez ońalady, aýrýhanada burynǵydaı uzaq jatpaıdy. Mundaı ınnovasııalyq operasııanyń jasy 70-ten asqan jáne odan egde jastaǵylar úshin tıimdiligi joǵary.
«Qolqa qaqpaqshasynyń stenozy» – orta qaqpaqshasy tarylyp, qajetinshe ashylmaǵan kezde, ıaǵnı júrekten denege qannyń qalypty ótýine kedergi keltiretin sańylaýdyń qatty tarylýynan paıda bolatyn kesel.
Al naýqastar qalalyq Kardıologııa ortalyǵynda júrektiń ýltradybystyq zertteýinen óte alady. Buǵan qosa joǵary deńgeıde dıagnostıkalaýǵa múmkindik beretin 128 tilimnen turatyn zamanaýı KT apparaty bar. Kórsetkishter boıynsha qajet bolǵan jaǵdaıda pasıentterge jedel hırýrgııalyq TAVI (transcatheter aortic valve implantation) operasııasy jasalady.
Osy arada TAVI ortalyǵynyń ashylýyna oraı, Kardıologııa ortalyǵynyń qyzmetkerlerine sheberlik dárisin ótkizý úshin Fraıbýrgten (Germanııa) endovaskýlıarlyq hırýrgııa dırektory Frans-Iozef Neıman arnaıy shaqyrtylǵanyn aıta ketken jón.
Qalalyq kardıologııa ortalyǵynyń dırektory, medısına ǵylymdarynyń doktory, professor Roza Qýanyshbekova: «Qolqa qaqpaqshasy tarylǵan pasıentterimiz bizdiń stasıonarǵa qaıta-qaıta túsip jatady. Al konservatıvti em-dom barlyq kezde tıimdi bola bermeıdi. TAVI ádisin qoldaný jáne oǵan qosa TAVI ortalyǵynyń ashylýy – densaýlyq saqtaý júıesindegi mańyzdy oqıǵa. Pasıentterge de aıtarlyqtaı paıdasy kóp. Dástúrli operasııa jasy kelgen, egde jastaǵy pasıentter úshin tym qaýipti. Al bul operasııadan keıin naýqas tez ońalady ári asqyný yqtımaldyǵy az. TAVI otasy qolqa qaqpaqshasy stenozynyń aýyr túrine dýshar bolǵan jandardyń densaýlyǵyn aıtarlyqtaı jaqsartady. Sondaı-aq TAVI ortalyǵy kardıohırýrgııa salasyndaǵy mańyzdy medısınalyq zertteýlerdi damytýǵa, arnaıy mamandardy daıarlaýǵa óz úlesin qosady», deıdi.
Ortalyqta osy operasııany júzege asyra alatyn, Ulttyq ǵylymı kardıohırýrgııa ortalyǵynyń mamandary mashyqtandyrǵan Germanııa men Túrkııa klınıkalarynyń jetekshi dárigerlerinen bilim alǵan qyzmetkerler bar.
«TAVI prosedýrasy sandaǵy kúretamyr arqyly baratyn kateter arqyly júzege asyrylady. Kateter jańa klapandy qalaǵan jerge jetkizip, onda ol tarylǵan klapandy ashyp, aýystyrady. Bul úderis narkozsyz jasalady jáne júrekke ashyq operasııa jasaýdy qajet etpeıdi, qan aǵymyn qalpyna keltirýge múmkindik beredi. Al munyń barlyǵy bir jerden tabylýy naýqastyń máselesin jedel sheshýge múmkindik beredi», deıdi qalalyq kardıologııalyq ortalyqtyń rentgen hırýrgııasy bóliminiń meńgerýshisi Orazbek Sahov.
Endovaskýlıarlyq hırýrgııa dırektory Frans-Iozef Neıman óz elinde qolqa qaqpaqshasyn aýystyrý operasııasy jıi jasalynatynyn, TAVI ımplanty óte damyǵanyn, Germanııa osy otany júrgizý jaǵynan Eýropada aldyńǵy orynǵa ıe ekenin aıtady.
Al 2 mıllıonnan asa halqy bar megapolıske de osyndaı bir ortalyq asa qajet ekeni aıtpasa da túsinikti. Sondyqtan bul joba MÁMS pen TMKKK aıasynda atqarylǵanyn aıta ketken jón. Eń bastysy, Almaty aımaqtardan kelgen naýqastardy da ajaldan arashalap qana qoımaıdy, bul jerde maıtalman mamandar tájirıbe almasa otyryp, medısınany da damytýǵa bolady.
ALMATY