Azamattyq avıasııa ardagerleri keńesiniń bastamasy boıynsha, aqpan aıynyń alǵashqy kúni Qazaqstannyń azamattyq avıasııa qyzmetkerleri kúni bolyp belgilenip, kásibı merekelerdiń tizbesi qaıta jańardy.
Alǵash ret atalyp jatqan azamattyq avıasııa qyzmetkerleriniń kásibı merekesine oraı Kólik mınıstrliginde sala ardagerleri men qyzmetkerleriniń, avıasııalyq kompanııalar men kásiporyndardyń, sondaı-aq sheteldik seriktes uıymdardyń ókilderiniń qatysýymen saltanatty is-shara ótti. Mınıstr Marat Qarabaev avıatorlardy quttyqtap, salalyq nagradalardy tabys etti.
«Azamattyq avıasııa salasy otandyq kólik júıesiniń mańyzdy quramdas bóligi ispettes. Bul ıgi bastama salany damytý men odan ári nyǵaıtý, elimizdegi avıasııa mamandarynyń patrıottyq rýhyn kóterý jolyndaǵy mańyzdy qadam bolyp otyr. Birlesken kúsh-jigerdiń arqasynda atalǵan sala álemdik qoǵamdastyqta óziniń laıyqty ornyn ıelendi. Atap aıtqanda, ushý qaýipsizdigin qamtamasyz etý joǵary deńgeıde, saladaǵy negizgi kórsetkishter men jerústi ınfraqurylymy kúnnen kúnge jaqsaryp keledi», dedi sala basshysy saltanatty jıynda.
Merekelik is-sharada «Qurmetti avıator» medalimen azamattyq avıasııa ardagerleri M.Korovkın jáne M.Aıazbaeva, «Qazaeronavıgasııa» RMK Aqtaý fılıalynyń dıspetcheri S.Mıftahova, Air Astana áýekompanııasynyń Airbus trenajeriniń nusqaýshysy A.Petın, SCAT áýekompanııasynyń kadrlyq jáne quqyqtyq jumys departamentiniń dırektory A.Ganeev, Qazaq Air dıspetcheri D.Osmanov marapattaldy.
Mınıstrdiń Qurmet gramotasymen áýe kemesiniń komandıri, azamattyq avıasııa ardageri E.Ospanov, SCAT áýe kompanııasynyń prezıdenti V.Denısov, Air Astana vıse-prezıdenti E.Shamshıev, «Qazaeronavıgasııa» RMK bas dırektory N.Ahmetov, «Qazaqstannyń avıasııalyq ákimshiligi» AQ bas dırektory K.Radý, Qazaq Air dırektory E.Naýryzbaev, Astana áýejaıynyń bas dırektory Iý.Djaýder, Almaty halyqaralyq áýejaıynyń prezıdenti A.Ersoı, Azamattyq avıasııa akademııasynyń rektory, basqarma tóraǵasy B.Seıdahmetov nagradtaldy.
Sondaı-aq azamattyq avıasııa qyzmetkerleri kúnine oraı uıymdastyrylǵan ústel tennısi boıynsha týrnırdiń jeńimpazdaryna arnaıy dıplomdar men kýbokter tabys etildi.