AQSh-tyń Las-Vegas qalasynda aralas jekpe-jekten «UFC Fight Night 235» týrnıri ótti. Sol básekelerdiń birinde qazaqtyń uly Azat Maqsum jergilikti faıter Charlz Djonsonmen judyryqtasty.
Osyǵan deıin 17 kezdesýdiń barlyǵynda jeńiske jetip, 12 qarsylasyn esinen tandyrǵan 28 jastaǵy qandasymyz úshin bul álemdegi eń beldi promoýshendegi ekinshi jekpe-jegi edi. Byltyr qarasha aıynda Azat UFC-degi tusaýkeser kezesýinde amerıkalyq Taıson Nemdi upaı sanymen utty.
Keshegi jarysta Maqsumnyń daıarlyǵy nashar ekeni birden baıqaldy. Birinshi kezeńde onyń basymdaý bolǵany ras. Biraq odan keıin qasha júrip shaıqasqan Djonson qandasymyzdyń birde-bir aýyr soqqysyn ózine darytpady. Azat qansha talpynǵanymen, eshteńe óndire alǵan joq. Kerisinshe, ekinshi kezeńde AQSh ókiliniń básekeni merziminen buryn aıaqtaýǵa múmkindigi boldy. Ol Maqsumdy jyǵyp aldy da, «qylqyndyrý» tásilin jasaýǵa tyrysty. Biraq bul qaýipten qazaq ońaı qutyldy. Báseke aıaqtalǵan bette barlyq úsh tóreshi 29:28 esebimen jeńisti Charlz Djonsonǵa berdi. Sóıtip, Azat Maqsum óziniń sporttyq mansabynda alǵash ret jeńilis tapty.