Qaladaǵy qarııalardyń qaýyrt jumysy joq, kópqabatty úıdiń aýlasynan uzamaıdy. Bul egde tartqan jannyń densaýlyǵyna zııan. Nege deseńiz, adam qımyldamasa, qan aınalym úderisi de tómen bolady. Al neǵurlym belsendi tirlik etse jasy uzaq, deni saý bolmaq. Onyń ústine «qarty bar eldiń qazynasy bar» dep qazaq áriden oılaǵan. Osy oraıda oblys ortalyǵynda «Belsendi uzaq ómir súrý ortalyǵy» jumysyn bastady.
Taldyqorǵan qalasynda kópten kútken «Belsendi uzaq ómir súrý ortalyǵy» esigin aıqara ashty. Bul sátti zeınetke shyqqan jandar asyǵa kútip júr edi. Sebebi zeınet jasyndaǵy adamdardy áleýmettendirý jáne olardy belsendi mádenı-shyǵarmashylyq, sporttyq, iskerlik ómirge tartýdyń negizgi joly – osy ortalyq. Buǵan qosa olardyń fızıkalyq jáne psıhologııalyq saýlyǵyna yqpal etý arqyly ómir súrý uzaqtyǵyn arttyrýǵa járdemdesedi.
Eń ǵajaby, mundaı ortalyq qalada buryn da bolǵan, biraq onyń jumysyn júrgizip, damytý úshin qoǵamdyq uıymdar arasynda konkýrs oınatylatyn. Jetisý oblysy ákiminiń baspasóz qyzmetiniń málimetinshe, ortalyq kommýnaldyq memlekettik mekeme formatynda qaıta ashylyp otyr, qazir onyń qýaty eki esege artyp, 220 orynǵa laıyqtalǵan.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ermek Mızambaevtyń aıtýynsha, bir ǵana oblys ortalyǵynda 25 myńǵa jýyq zeınetker turady. Sondyqtan oblys ákiminiń tapsyrmasy boıynsha KMM qurý týraly sheshim qabyldandy.
«Eńbek resýrstary jáne belsendi uzaq ómir súrý ortalyǵy» KMM basshysy Áset Orazbekulynyń sózine qaraǵanda, ortalyq kelýshilerdiń suranysy men qyzyǵýshylyǵyna qaraı 12 qyzmet túrin tegin kórsetip, 38 qyzmetkerdi jumyspen qamtyp otyr.
«Qarjylyq jáne kompıýterlik saýat, aǵylshyn tili, qazaq tili, toqý jáne tigin kýrstaryn uıymdastyrdyq. Sport zaly bar. Ioga, vokal, shahmat-doıby, ústel tennısi boıynsha sabaqtar ótedi. Qazir ortalyqqa yńǵaıly ýaqytta 210-nan asa adam keledi. Basseınge barý máselesi sheshilip jatyr. Aldaǵy ýaqytta ashyq aspan astynda is-sharalar, saıahattar ótkizýdi josparlap otyrmyz. Ol úshin 16 oryndyq avtobýs satyp alyndy», deıdi A.Orazbekuly.
Jańa ortalyqqa arnaıy kelgen 72 jastaǵy Gúlzada Berdesheva óz áserimen bólisip: «Bizge munda bári unaıdy. Men shahmatqa, doıbyǵa, ústel tennısine qyzyǵamyn. Bul jerde dál úıdegideı jylylyq pen jaılylyq bar. Osyndaı tamasha mekemeniń ashylýyna atsalysqandardyń barlyǵyna alǵys aıtamyn!», deıdi zeınetker.
Ortalyqtyń turaqty kelýshileriniń biri Svetlana Syplakova da dán rıza. «Men til kýrstaryna barǵandy unatamyn. Ásirese qazaq tili pániniń muǵalimi Sáýle Arnaıqyzyn erekshe atap ótkim keledi. Sol kisiniń arqasynda memlekettik tildi túsinip qana qoımaı, jaılap sóıleı bastadyq. Maǵan bul jerde toqý, tigin, ıoga sııaqty qyzyǵýshylyǵyma saı keletin úıirmeler unaıdy», dedi ol.
Atap ótsek, ortalyqty damytýǵa 2024 jylǵa 300 mln teńge bólingen. Búgingi tańda ortalyq 16 oryndy shaǵyn avtobýs, trenajerler, gantelder, júgirý joly, jattyǵýǵa arnalǵan quraldar, qabyrǵa tirekteri, gımnastıkalyq doptar, ústel tennısi, shahmat, doıby, toǵyzqumalaq oınaýǵa arnalǵan qural-jabdyqtar, tigin mashınalary, toqyma jıyntyqtary, massajdyq oryndyq, jyljymaly proektorlarǵa arnalǵan ekrandar, stereo júıe, proektorlar, marker taqtalary jáne basqa da qajettilikter satyp alynǵan.
Qurylystyń jalpy aýdany – 1349,8 sharshy metr. Birinshi qabatta oqý sabaqtaryn ótkizýge arnalǵan oryndar, medbıke buryshy, massajdyq oryndyq, al ekinshi qabatta sport zaly, vokaldyq jattyǵý bólmesi, shahmat, doıby, tennıs oınaýǵa arnalǵan ústelder, tigin buryshy bar. Barlyq qyzmet tegin kórsetiletin ortalyqqa Taldyqorǵannyń zeınetke shyqqan kez kelgen turǵyny bara alady. Kelýshiler jeke basyn kýálandyratyn qujat pen zeınetkerdiń jeke kýáligin kórsetýi kerek. Belsendi uzaq ómir súrý ortalyǵy Taldyqorǵan qalasyndaǵy Jeltoqsan kóshesi, 259-úı mekenjaıynda ornalasqan.
Jetisý oblysy